DILI—Federasaun Voleibol Timor-Leste (FVTL) komesa fo formasaun báziku ba treinadór ho arbitrajen sira iha munisípiu hitu ne’ebe sei hahú iha loron 10 fulan Janeiru 2022 tanba hakarak dezenvolve desportu Voleibol husi baze ho Diak.
Kestaun hira ne’e prezidente Federasaun Voleiból Timor-Leste (FVTL), Inocêncio Araújo da Silva, informa, planu prioridade liu atu fó formasaun ba treinadór no arbitrajen sira iha fulan Janeiru 2022.
“Iha loron 10 fulan Janeiru 2022, FVTL sei fó formasaun báziku ba treinadór no arbitrajen sira iha munisípiu hitu (7), hanesan munisípiu Lautem, Vikeke, Manatutu, Manufahi, Aileu, Ermera, no Likisá atu nune’e bele halo kompetisaun nasionál”, dehan prezidente FVTL, Inocêncio Araújo da Silva ba jornalista via whatsApp, kinta (06/01).
Enkuantu prezidente hateten, atu halo kampionatu nasionál maibé orsamentu mak laiha, entaun sira hahú fó formasaun ba treinadór no arbitrajen sira.
Inocêncio afirma, “formasaun ne’e ba munisípiu 12 inklui Rejiaun Administrative Espesiál Oe-cusse Ambenu (RAEOA), kada munisípiu treinadór 20 pesoas no arbitrajen 10 hamutuk na’in-30 mak tuir formasaun”.
“Ita hahú treinamentu ne’e ba munisípiu hitu lai, depois iha fulan Abríl mak kontinua ba munisípiu 5 inklui RAEOA”, nia dehan.
Prezidente atuál informa, treinamentu ne’e sei hahú iha munisípiu Lautem no durasaun tempu ba durante loron lima kada munisípiu.
Nia esplika, “partisipante sira tenke prienxe kritériu hanesan kopia eleitorál tahan ida, foto 3×4 ho kór azúl tahan-3, ho idade 20 to’o 40 koñesimentu arbitrajen no treinadór ho idade 20 to’o 50”.
Sira tenke iha koñesimentu báziku ba jogu voleiból, prioridade liu ba mestre desportu no eis jogadór voleiból, la inklui jogadór ativu iha liga voleiból Timor-Leste.
Nia afirma, “orsamentu ne’ebé mak uza ba treinamentu nivel báziku ba treinadór no arbitrajen sira hamutuk dollar Amerikanu 74.678,00 USD, apoiu husi governu liuhusi sekretáriu estadu juventude no desportu”.
Rep.: ADS
