DILI-Federasaun Voleibol Timor-Leste (FVTL) sei realiza liga voleibol epoka 2022 tanba durante tinan rua ona la iha atividade husi 2019-2021 afeta husi pandemia covid-19 iha teritoriu nasional.
Tanba durante tinan rua iha 2019-2021 federasaun la realiza liga voleibol Timor-Leste ne’ebe tinan ida ne’e federasaun sei realiza liga voleibol maski iha mudansa ba orsamentu.
“Iha fulan outubru to’o novembru tinan ne’e sei realiza liga voleibol Timor-Leste maski iha mudansa oituan kona orsamentu tenki realiza fali liga hanesan tinan rua liu ba kotuk ne’ebe ita sei prepara kalendariu ba ida ne’e depois ita sei aprezenta proposta ba SEJD liu husi CDTL” prezidente voleibol Inocêncio da S. Araújo ba jornalista JHD iha edifisiu CDTL Caicoli, Dili sesta (11/03).
Inocêncio informa, federasaun tempu badak planu anual 2022 inklui liga, sira sei hatama ba CDTL iha inisiu tinan 2022 sira halo formasaun iha munisipiu hitu ne’ebe foin remata iha loron 25 fulan fevereiru ne’e mak sira sei prepara nia relatoriu ba ida ne’e tan ne’e proposta sira seidauk hatama no realiza liga depende orsamentu mak iha bainhira sira halo divizaun dahuluk deit labele tanba degrada ekipa ida husi leten tun mai ne’ebe sira buka dalan halo divizaun daruak hodi nune’e hetan fali ekipa ida ka rua sae fali ba divizaun dahuluk tanba sira halo divizaun dahuluk ekipae neen ne’ebe labele tan ne’e buka dalan oinsa hala’o jogu ne’e ho orsamentu ne’ebe mak SEJD prepara sira ajusta deit programa ba ida ne’e para hala’o atividade rua ne’e hotu.
Nia hatutan, divizaun datoluk sira seidauk hanoin karik bainhira rezultadu husi formasaun sira iha munisipiu sira bele hamosu tan klube tanba voleibol la hanesan ho futebol iha munisipiu tomak halo atividade ne’e tanba momentu agora menus liu iha suku la halo atividade voleibol hanesan iha tempu Indonesia nian ne’ebe sira introdus politika governu liu husi SEJD hodi fo formasaun ba treinador no arbitrajen iha nível postu sira para bele organiza jogu, sira bele hetan jogador foun sira mai husi nível baziku.
Inocêncio haktuir, sira sei kontinua halo formasaun ba treinador no arbitrajen alende sira halo liga voleibol, ne’ebe kalendariu iha tinan ne’e iha FND no preparasaun ba Asian Games tan ne’e sira halo atividade adapta tuir kalendariu nasional no internasional nian no ba voleibol praia sira sei diskusaun ho diresaun voleibol praia para atu halo kompetisaun ruma.
“ita sei kontinua halo formasaun ba treinador no arbitrajen alende ita halo liga voleibol, ne’ebe kalendariu iha tinan ne’e iha FND no preparasaun ba Asian Games tan ne’e Ita halo atividade adapta tuir kalendariu nasional no internasional nian no ba voleibol praia ita sei diskusaun ho diresaun voleibol praia para atu halo kompetisaun ruma” tenik Nia
ADS
