Dili – to ohin loron Atleta husi Federasaun Atletismu Felisberto de Deus, ne’ebé mak hatudu ona prestasaun di’ak hodi oferese ona medalla osan mutin 2 ba Timor-Leste iha jogu Sudeste Áziatiku (Sea Games), ba edisaun 31 iha Vietname, seidauk kaer osan subsidiu ne’ebé SEJD oferese.
Antes ne’e Sekretariu Estadu Juventude no Desportu (SEJD) Abrao Saldanha, atribui ona kuantidade osan iha forma plaka hamutuk 42.000.00 Mill ba atleta no ofisiál sira ne’ebé mak hatudu ona prestasaun iha Sea Games edisaun 31 ne’ebé mak Realiza iha sidade Hanoi, Vietname.
Timor-Leste ba partispa iha Vietnam ho Modalidade 7, iha ne’ebé modalidade 3 konsege konkista medalla osan mutin 3 no osan metan 2 .
Medalla osan mutin 3 ne’e oferese hosi Atleta Felisberto de Deus husi Modalidade Atletizmu, oferese medalla osan mutin 2, no Atleta husi modalidade Boxe Delio Anzaqeci Mouzinho, oferese medalla osan mutin 1. Enkuantu medalla osan metan 2 ne’e oferese husi Atleta Santina Adelaide de Sousa husi Modalidade Taekondow, no atleta José Quintas da Silva Barreto hosi Modalidade Boxe.
Husi Modalidade 3 ne’ebé mak hatudu prestasaun ne’e simu prémiu ho tipu rua mak hanesan exelensia no exesional atu motiva atleta sira hodi mantein hatudu prestasaun di’ak.
Felisberto de Deus ne’ebé mak oferese medalla osan mutin 2 iha Sea Games ne’e simu prémiu hamutuk 15.000.00 mill USD, no Atleta Delio Anzaqeci Mouzinho husi modalidade Boxe hetan premiu osan ho montante 7.500.00 USD.
Atleta Santina Adelaide de Sousa husi Modalidade Taikondow hetan Osan montante hamutuk 4.500.00 USD, no atleta José Quintas da Silva hosi Modalidade Boxe hetan premiu osan ho montante hamutuk 4.500.00 USD.
Núne’e mós ba treindora husi Atletismu simu 5.000.00 USD, Boxe 4.000.00 USD, no ikus liu Taikondow 1.500.00 USD.
Maibé ho montante ne’ebé mak sira simu ne’e palaka de’it tanba to’o oras ne’e sira seidauk hetan sira nia direitu tanba to’o oras ne’e governu liu husi SEJD seidauk transfere ba sira.
Kestaun hirak ne’e hato’o husi Atleta Modalidade Atletismu, Felisberto de Deus, ba jornalista sira iha Estadion Munisipal Dili segunda (27/05).
“To’o agora ami seidauk hetan, maibé ami nafatin ezizi tanba ami nia preparasaun mós besik, ami husu ba atu labele husik ida ne’e ba tempu naruk tanba ami mós hein kleur ona ami espera katak governu sei kolabora ho Federasaun bele atribui lalais mai ami para ami mós bele halo ba ami nia perparasaun ba eventu ne’ebé mak sei Realiza” dehan Felisberto.
Nia haktuir, Governu fo ona palaka ba sira maibé to’o agora sira seidauk Simu tanba sei iha prosesu nia laran.
Hatan ba Kestaun ne’e Sekretariu Estadu Joventude no Desportu (SEJD), Abrao Saldanha, hatete, sira prosesa hamutuk ho sistema pagamentu ne’ebé mak tenke liu husi Federasaun.
“Ida ne’e ami prosesa tiha ona hamutuk ho sistema pagamentu ne’e ita tenke halo liu husi Federasaun premiu ne’e iha tipu 2, mak ida premiu baze ne’e mak ida direitu ida dekretuu lei diploma Ministerial fó ne’e osan mutin hetan 5.000.00 no osan metan hetan 3.000.00” Tenik Abrao.
Governante ne’e explika, sira aumenta tan prémiu bolu prémiu de bolsu desportivu ne’e 50% husi premiu baze signifika 2.500.00 ho 1.500.00, Ne’e la fó direitamente iha cash tau hela iha ne’e sira uza de’it ba selu sira nia eskola, selu sira nia kursu no sosa sira nia ekipamentus ba treinu nia ou hadia sira nia toba fatin ida ne’e maka SEJD tau ba Premiu ida ne’e i premiu ida fali ne’e transfere ba sira
“Ita nia dekretu lei ne’e loloos selu iha tinan oin tanba sira ba tinan ida ne’e, sira mai halo relatoriu ita halo orsamentu ba tinan oin mak foin selu maibé ami deisdee selu agora” nia Salienta.
“Federasaun sira ne’ebé mak hetan prestasaun ne’e foin hatama sira proposta mai no ami avalia hotu ona balu ami aprova ona iha semana kotuk Atletismu nian foin aprova ohin Taikondow nia mós aprova ona hein de’it prosesu finansas central atu halo transferensia ba sira nia Federasaun para sira bele selu sira nia atleta i ba ekipa teknika Federasaun lian no ba klubu nian” nia hakotu.
Enkuantu Sea Games edisaun 31 Vietname foin lalais ne’e Timor Leste partisipa ho modalodade 7 kompostu husi Modalidade Taikondow, Atletismu, Karate-do, Natasaun, Futebool, Halterofelismu, no Boxe.
CharllY Junior
