DILI-Federasaun Atletizmu Timor-leste (FTA sigla portuges) lori atleta Manuel Amaral hodi kompete iha World Athletic Championship (WAC) ba edisaun 18 iha Estadu Unidu Amerika.
World athletic Championship nu’udár kampeonatu atletismu ineternasionál ne’ebé hala’o kada tinan, ba tinan ida ne’e sei akontese hahu husi loron 15, semana oin no sei termina iha 24, iha Estadu Unidu America.
Ho nune’e, ohin, Federasaun Atletismu ne’ebé kompostu husi Prezidente Afranio Xavier, Treinador no Atleta Manual Amaral aranka ba Jakarta no kontinua ba Estadu Unidu America hodi partisipa iha World athletic Championship.
“Ohin ami desloka ba Jakarta para iha ne’eba depois aránka ba Estadu Unidu Amerika, tanba ita Atleta Manuel Amaral sei kompete iha World athletic Championship ne’ebe sei realiza iha loron 15 fulan Jullu tinan ne’e“, Prezidente FTA Afranio Xavier ba jornalista sira iha edifisiu SEJD Lesidere, Díli segunda (4/07).
Prezidente hatutan, eventu ne’e importante ba federasaun nu’udar membru ba federasaun internasional tanba obrigasaun federasaun tenke partisipa ne’ebe sai hanesan pra kualifikasaun ba atleta hodi bele partisipa iha olimpiade iha Paris, Fransa 2024.
FTA nia partisipasaun ne’e hetan apoiu finanseiru husi SEJD ho montante orsamentu 16,096 USD atu bele ba compete nomos reuniaun ho federasaun internasional atu koalia kona ba dezenvolvimentu modalidade atletizmu iha Timor-Leste.
ADS
