Dili — Mauputar Fc kontinua hatudu nia superioridade jogu hafaoin halakon nia ekipa adversariu Jocris Fc ho score 7-1, iha jogu kontinuasaun Taca FALINTIL Futsal 2022. Hosi rezultadu vitória ne’e mós lori ekipa Mauputar Fc, hakat uluk ba oitavo finais Taca FALINTIL Futsal 2022.
Jogu entre ekipa rua ne’e hala’o iha kampu Futsal FFDTL fatuhada Dili, tersa (17/08), iha inisiu jogu Primeira parte ekipa rua lansa kedas kontra ataka ba malu maibé ekipa Mauputar Fc, ne’ebé mak hatudu ritmu jogu ho di’ak konsge sobu defeza hosi Jocris Fc, hodi lansa kedas golu tolu tuir malu liu husi jogador Davidson Henrique iha minutu 9, Agy Lay iha minutu 11 no Cesario Barreto iha minutu 15.
Enkuantu atake ne’ebé mak lansa hosi ekipa Jocris Fc, guarda defensivu hosi ekipa Mauputar Fc mantein solidu hodi la fó fatin ba nia adversáriu hodi produs golu ho núne’e too termina jogu Primeira parte ekipa Mauputar Fc lídera provizoriu ho score 3-0.
Kontinua ba jogu segunda parte ekipa rua mantein lansa kontra ataka ba malu liu hosi tekniku no tatika ida idak nian maibé ekipa Mauputar Fc, ne’ebé mak hatudu nia jogu superioridade konsege produs tan golu haat liu hosi jogador, Cesario Barreto iha minutu 23, Agy Lay iha minutu 32, no Mariano Moniz, marka golu rua tuir malu iha minutu 38 nia laran.
Enkuantu ekipa Jocris responde de’it golu ida liu husi jogador Filipe Alves iha minutu 26 ho núne’e to’o termina jogu segunda parte vitória ba Mauputar Fc ho score 7-1.
Hosi rezultadu vitoria ne’e dudu ekipa Mauputar Fc nu’udar ekipa dahuluk ne’ebé mak ultrapasa ba 16 Taca FALENTIL Futsal 2022 ho pontus 6 hosi jogu dala rua no sei iha tan jogu ida.
Enkuantu ekipa Jocris Fc, iha pozisaun 4 ho pontus 0 no Ofisialmente elimina ona hosi Taca FALINTIL 2022, tanba hosi jogu rua ne’ebé sira hala’o derota hotu.
Ekipa kobertura
