DILI– Prezidente asembleia jeral Domingos Maliteti informa, sexta feira loron 13 fulan janeiru tinan ne’e, Federasaun Boxe Amadora Timor Leste (FBATL) sei realiza kongresu anual hodi hili prezidente foun ba periodu 2023-2027.
“Ita nia data ne’ebe mak ita atu realiza kongresu, iha sexta feira dia 13 de Janeiru agora, ita mos sei distribui konvite ba asosiasaun 10 no klubu 23 nunee bele partisipa iha kongresu” dehan Prezidente asembleia Domingos Maliteti ba jornalista iha Benifika Dili segunda (09/01).
Nia dehan, Asosiasaun 10 ne’e mak lospalos, viqueque, Baucau, Manatutu, Aileu, Same, Ainaro, Ermera, Maliana no Oecusse
Konaba pakote hira mak atu kompete iha kongresu ne’e seidauk klaru tanba ne’e sei hatene iha tempu kongresu.
“Hau hanoin tanba prezidente sesante rezigna aan ona ne’e mak ohin ha’u rasik mak mai toma responsavel ba asembleia jeral ida ne’e ba periodu ida ba tinan 4 nain konaba kandidata aan ita boot sira sei hatene iha kongresu” Nia afirma.
Nia hatutan, konaba fatin atu realiza kongresu anual ne’e sei perpara hosi Comite Olimpico Nasional Timor Leste (CONTL) nunee mos orsamentu CONTL sei fo 2500 ba transporte hosi asosiasaun no klubu sira inklui ba akomodasaun.
Kongresu ne’e rasik sei hala’o durante loron ida tanba ne’e Federasaun sei atribui estatutu no regulamentu ba asosiasaun Sira hotu.
Nia dehan, estatutu Federasaun Boxe la taka dalan ba ema atu kandidata aan hodi sa’i prezidente ba Federasaun Boxe nian.
“Ha’u hanoin konaba kandidata estatutu fo dalan se deit bele mai kandidata aan ba prezidente Federasaun estatutu fo dalan” Nia hakotu.
Dvo
