Maliana–Prezidente Asosiasaun Futebol Munispiu Bobonaro hamutuk ho asosiasaun futebol maioria prontu atu lori Nilton Gusmao lidera Federasaun Futebol Timor-Leste (FFTL) hodi hadia Futebol iha Timor Leste.
Federasaun Futebol Timor-Leste ( FFTL) sei realiza Kongresu Anuál ba dala-IX iha loron 10 fulan janeiro tinan 2024, hodi hili lideransa foun ba pozisaun Prezidente FFTL ho membru ezekutivu na’in ida.
Dalan ba kongresu anuál FFTL ba da-9 ne’e, hahú mosu ona rumores ne’ebé espalha iha asosiasaun futeból ho públiku sira nia leet, katak sei hamosu pakote rua mak hanesan eis-prezidente FFTL Francisco Kalbuadi Lay sei pakote ida ho Aleixo Cobra/Ipolito Soares no mos Nilton Gusmão ne’ebe mak nu’udar pioneiru ba Liga Futeból Timor-Leste hahó ho LFA to’o transforma ba LFTL, sei pakote ida ho Prezidente Interinu FFTL Jenerál Falur Rate Laek.
Nune’e Iha kinta loron 16 fulan novembro 2023, Prezidente Asosiasaun Futeból Munisípiu Bobonaro ne’ebe mak nu’udar membru ekipa susesu ba kandidatu Nilton Gusmão hateten, iha fulan agostu liubá sira deklara ona fó apoiu iha City-8, tanba ne’e sira sei mantein apoiu Nilton Gusmão atu ba lidera Federasaun Futebol Timor-Leste.
“agora daudaun ne’e iha ona asosiasaun 13 mak apoiu Nilton Gusmão hodi kandidata an ba Prezidente Federasaun Futebol Timor-Leste” dehan Domingos “GOUVEIA” Moniz ba JHD iha Ginázio Munisipál Maliana.
“Ba ha’u hanesan Prezidente Asosiasaun Futeból Munisípiu Bobonaro ne’ebé mos membru ekipa susesu kandidatu Nilton Gusmão nian, hakarak atu dehan de’it iha momentu ida ne’e Asosiasaun ne’ebe fó apoiu ba Nilton Gusmão ninia kandidatura mak hanesan Asosiasaun Futeból Munisípiu sira; Bobonaro, Liquiça, Oecusse, Baucau, Viqueque, Ainaro, Lautem. Asosiasaun Profisionál sira; Árbitragem, Treinadór, Sentru Juvinil, Feminina, Futsal no reprezentante Primeira Divizaun Karketu Díli FC” nia informa.
“Ami garante katak Nilton Gusmão sei lidera Federasaun Futeból Timor-Leste tanba ita persija duni figura foun ho hanoin diak ba dezenvolvimentu futeból iha ita-nia nasaun ne’e hodi sai di’ak liu tan ba oin” nia afirma.
Nia akresenta, asosiasaun 13 ne’e fiksu ona, i sira sei esforsu atu halo nafatin aproximasaun ho sira ne’ebé durante ne’e la apoiu Nilton Gusmão, sira sei besik ba asosiasaun sira atu nune’e bele fó apoiu ba kandidatu Nilton Gusmão, tanba ne’e sira garante katak laos asosiasaun 13 de’it maibé bele aumenta tan no sei la menus, ne’e ha’u garantia.
Nia explika razaun fundamentál ne’ebé sira hili Nilton Gusmão ne’e tanba tempu ona persija figura foun ho espíritu foun, no figura ne’e jerasaun foun ho idade joven ne’ebé hanoin mos sei fresku no iha paixão forte ba dezenvolve futeból iha Timor-Leste.
Nia haktuir, Nia envole futeból dezde inísiu Federasaun Futebol Timor-Leste ne’e hamrik, ne’ebé nia hatene kle’an Francisco Kalbuadi Lay, tanba ne’e mak persija figura foun no jerasaun foun.
Nia afirma, Francisco Kalbuadi Lay antes ne’e lidera ona FFTL no iha nia mandatu halo ona buat lubuk ida, liu-liu halo aproximasaun ho FIFA, AFC, AFF ikus mai Federasaun Futebol Timor-Leste hetan rekonhesimentu hosi FIFA, tanba ne’e sira mos rekonhese Kalbuadi Lay nia kontribuisaun maibé iha buat barak mak nia la halo.
Tanba ne’e mak Asosiasaun Futeból Bobonaro persija apoiu duni figura foun iha Kongresu Anuál ne’ebé sei realiza iha loron 10 fulan janeiro 2024.
“Fo hanoin ba kolega asosiasaun sira hotu se bele hanoin ida de’it atu nune’e futeból Timor-Leste bele la’o ho di’ak, la’o tuir ita nia hakarak, la’o tuir adeptus nia hakarak atu nune’e ita nia ranking FIFA ne’e ita bele hadia liuhosi kandidatu prezidente foun FFTL” nia hakotu.
JHD
