DILI — Asosiasaun futebol 13, firme ona hodi fo sira nia votus konfiansa ba kandidatu prezidente FFTL Nilton Telmo Gusmão Santos, atu lidera Federasaun Futebol Timor-Leste (FFTL) hodi kompleta mandatu ba periodu 2024-2026.
Iha loron 10 fulan Janeiro tinan 2024, Federasaun Futebol Timor-Leste (FFTL) sei realiza Kongresu Ordináriu ba-dala IX hodi hili prezidente FFTL foun ba periode 2024-2026.
Dalan ba Kongresu Ordináriu ne’e kandidatu nain rua mak sei kompete iha kongresu ne’e hodi lidera FFTL bá mandatu tinan rua ne’e.
Relasiona ho Kongresu Ordináriu ne’ebe mak besik dadaun ne’e ekipa trabalho sira hosi kandidatu nain rua sei kontinua esforsu namanas hodi bele ganha asosiasaun sira atu hetan konfiansas hodi fo vitória ba ida-idak nia kandidatu iha Kongresu Ordináriu ne’ebe mak sei realiza iha loron 10 fulan Janeiro tinan 2024.
Maibé iha loron 23 fulan dezembru ekipa trabalho ba kandidatu Nilton Telmo Gusmão do Santos hala’o reuniaun ho Asosiasaun Munisipais, Asosiasaun Profisionais no Klube 1° Divizaun LFTL hamutuk total 13 hodi konsolida forsa atu lori kandidatu Nilton Gusmão ba Pezidente Ezekutivu FFTL.
“Enkontru ohin ne’e ekipa traballu kandidatu Nilton Gusmao ho asosiasaun sira ne’ebe firme ona apoio Nilton Gusmao, aleinde ida ne’e halo mos konsilidasaun forsa ne’ebe iha ona” dehan ekipa trabalho kandidatu Nilton Gusmao ne’ebe mak lakohi fo sai naran ba JHD iha city-8 Manleuana Dili Sabadu (23/12).
“Iha enkontru lidera rasik husi kandidatu Nilton Gusmão, hodi afirma nia konfiansa maximu ne’ebe asosiasaun sira fo ba nia. Asosiasaun ne’ebe apoio Nilton Gusmao iha iha 13 ona, maibe ekipa traballu mos sei halo nafatin aproximasaun ba asosiasaun sira seluk ne’ebe sidauk afirma sira nia pozisaun durante ne’e” afirma membru ekipa trabalho ne’e.
Konaba asosiasaun 13 ne’e membru ekipa trabalho informa, ne’e sei segredu no ekipa trabalho lakohi mensiona hodi asegura asosiasaun sira nia pozisaun.
Ho partisipasaun hosi asosiasaun futebol 13 ne’e ekipa trabalho mos deklara katak sei garante manán iha Kongresu Ordináriu tanba atu manan absoluta persija de’it votus 11.
“Sim, tan atu manán persija de’it votus 11, maibe kandidatu Nilton Gusmao iha ona votus 13” nia hatutan.
“Ami deklara asosiasaun 13 ne’e haree ba rezultadu kongresu dia 10 novembru liu ba ne’ebe fo votus ba relatoriu aktividade no relatoriu finansas FFTL nian”.
“Ami garante 100% votus ba kandidatu Nilton Gusmão mantein ho 13 votus. Tan komprimisu ne’ebe delegadu sira konfirma ona durante ne’e no afirma firme nafatin liu husi enkontru ohin loron ne’e presiju públiku no sosiadade hadomi futebol hatene katak iha Kongresu Extraordináriu dia 10 Novembro 2023 liu ba ne’e vota kontra relatoriu aktividade no finansas FFTL ne’e iha deit 5 no 3 abtensaun. Votus 13 ba aprovasaun ne’e mak durante ne’e ami ekipa traballu sempre konsilida ho lao hamutuk nafatin ho sira. Tamba ne ami la duvida no garante vitória iha dia 10 janeiro 2024 mai ne’e” nia akresenta.
Nia dehan, konsolidasaun forsa apoio kandidatu Nilton Gusmão ekipa traballu hahu depois kongresu dia 1 de Julho 2023 no nia rezultadu mak hatudu iha Kongresu Extraordináriu dia 10 Novembro 2023.
Antes ne’e Iha segunda loron 18 fulan dezembru ne’e protavóz hosi ekipa kandidatu Francisco Kalbuadi Lay hatete katak iha ona asosiasaun 13 mak asina ona akta hodi lori kandidatura Francisco Kalbuadi Lay lidera FFTL, hatan ba deklarasaun ne’e, ekipa trabalho ne’e hatete, rezultadu votasaun iha deit nain 5 no abtensaun 3.
“Los duni husi parte kandidatu Francisco Kalbuady deklara katak sira iha ona asosiasaun 13 ne’ebe mak apoiu, maibe rezultadu kongresu dia 10 de Novembro sira nia votus iha deit 5, ne’ebe loron rua antes kongresu extraoridinariu ekipa trabalho Francisco Kalbuadi Lay deklara katak sira iha asosiasaun 14 maibe rezultadu votasaun iha deit na’in 5 no 3 abstensaun” ekipa trabalho ne’e hatete.
Entertantu asosiasaun sira ne’ebé mak iha direitu atu vota iha kongresu extraoridinariu ne’e hamutuk 21 mak hanesan, Asosiasaun Futeból Dili Leste, Díli Oeste, Manufahi, Manatuto, Baucau, Lautém, Viqueque, Ermera, Likisa, Bobonaro, Covalima, Aileu, Ainaro, Oe-cusse, Asosiasaun Arbitragem, Asosiasaun Treinador, Asosiasaun Futsal, Asosiasaun Futeból Feto, Asosiasaun Juvenil, Kampiaun Primeiru Divizaun Karketu Díli FC no kampiaun segunda divizaun DIT FC.
JHD
