DILI–Sekretariu jeral Asosiasaun Futebol Munispiu Viquque (AFV) Rosito Soares Do Rosario, hatete, polemika ba delegadu ne’ebe mak akontese iha kongresu FFTL bá dala-9 rezolvidu ona tuir estatutu asosiasaun nian kona-ba oinsá “Promove Relasaun Amigavel” liuhosi fornese maneira institusionál nesesáriu hodi rezolve disputa internál ruma ne’ebé akontese entre membrus, ho nune’e ami iha ona konkordánsia absoluta ba rezolve problema interna no ami garante sei la akontese tan iha próximu kongresu ba eleisaun Prezidente Ezekutivu FFTL no membrus Ezekutivu FFTL.
“Agora sobre polemika ne’ebe akontese iha kongressu ordináriu FFTL ba-dala IX iha dia 10 de janeiru 2024 liu ba, iha 16 de Janeiru estrutura AFV konvoka ona enkontru nível Komité Ezekutivu nian iha ona opsaun, ami halo akta inkontru no prepara ona karta ba desizaun konjunta hodi hein orientasaun husi FFTL” deklara Rosito Soares do Rosario, ba JHD via whatsapp Kinta (25/01/2024).
“Ita Sei dezenvolve karta no rezolusaun konjuntu ida hodi ba futuru kongressu tuir mai labele akontese tan polemika iha delegadu” nia informa.
“Sim polemika ne’e kuandu laiha kontribuisaun husi parte Sekretariadu-Jerál FFTL, Komité Eleitorál no Komité Rekursu, se sira serbisu tuir estatutu no rejimentu, serbisu ho onestidade, imparsiál, neutru no transparánsia ne’e Ita garante sei laiha polemika iha ultimu kongresu” nia afirma.
Nia haktuir, Maibe tamba iha kongresso extra-ordinariu FFTL ba da-9 ne’ebe momentu ne’eba assosiasaun 3 mak iha polemika ba delegadu tamba ne’e atu halo kongressu entaun estrutura hein hela karta notifikasaun ou orientasaun legal ruma husi FFTL mak sira bele halo kongressu extra-ordinariu assosiasaun nian atu ne’e kongressu ne’e rasik iha ninia legitimidade.
“Opsaun 2 ne’e prepara hotu tamba kuandu husi FFTL hatun ona orden atu halo kongressu internal ami prontu ezekuta no karik laiha orientasaun kongressu sei realiza iha fulan dezembru”
Rekorda fali katak, antes ne’e iha kongresu FFTL bá dala IX iha asosiasaun 3 mak sa’i polemika ba delegadu mak hanesan, Asosiasaun Futebol Munispiu Viquque, Asosiasaun Futebol Munispiu Ainaro no asosiasaun arbitrajen.
Antes ne’e iha loron 20 fulan janeiru ne’e asosiasaun arbitrajen realiza ona kongresu no Nivio Fernandes mak eleitu hodi lidera Asosiasaun Arbitrajen Futeból Timor Leste ba periode tinan 4 ho votus aklamasaun.
JHD
