DILI– Boxista Timoroan nain rua, Delio Anzaqeci Mouzinho, no Edgar Foe Quintas prontu ona atu sa’e Rin Boxe iha eventu Asian Games edisaun XIX iha Hangzhou China 2023.
Delio Anzaqeci Mouzinho laos boxista foun tanba atleta orijen hosi munispiu Lautem ne’e hamorin ona Timor Leste nia naran dala rua iha kompetisaun Sea Games 2023 Hanoin Vietnam Delio konsge oferese Medalla Osan mutin ida no mos iha Sea Games Kambodia 2023 Delio oferese tan medalla osan metan ida.
Ho prestasaun ne’ebe mak Delio hatudu ona iha eventu Sea Games liu ba Federasaun Boxing Amadora Timor Leste (FBATL), kontinua fó fiar ba nia hodi reprezenta tan Timor Leste iha eventu internasional Asian Games 2023 nee.
Ba JHD iha Timor Plaza Dili, sexta, (22/07) ne’e Boxista Delio Anzaqeci Mouzinho, ne’ebe mak atu kompete ho klase 71 kg ne’e haktuir, hafoin sira fila hosi Kambodia 2023 liu ba sira hala’o deskansa deit semana rua hodi kontinua hala’o perparasaun.
“Ami nia preparasaun ba Asian Games ne’e ami hahu depois ami fila husi kompete Sea Games 2023 iha Cambodia deskansa deit semana rua no kontinua halo perparasaun ba Asian games China, ha’u iha esperansa boot hakarak hatudu rezultadu diak” katak Delio.
Aleinde Delio Anzaqeci Mouzinho Boxista Edgar Foe Quintas ne’ebe mak antes ne’e mos konkista medaila osan metan ida mai Timor Leste iha Sea Games Kambodia 2023 liu ba ne’e mos afirma, ekipa nasional Boxe perparadu hodi kompete iha eventu refere.
“Ami nia preparasaun ne’e ami hala’o kedas iha fulan juñu tinan ne’e atu ba kompete Asian Games iha fulan setembru tinan ne’e no ami hein katak ami sei tama kazerna atu nune’e ami treinu hamutuk no dixiplina hodi nune’e bele hetan rezultadu diak iha Asian Games“, tenik Edegar
“Ami garante sei hatudu rezultadu diak iha Asian Games no agora ami mos prepara ba kompetisaun nasional boxing nian iha semana oin nian hein katak kompetisaun nasional ne’e ajuda ita nia preparasaun lao diak tan” nia hakotu.
Enkuantu hosi modalidade Boxe sei partisipa iha eventu ne’e ho atleta nain 4 mak hanesan Boxista Edgar Foe Quintas rasik sei kompete iha klase 54 no Delio Mouzinho klase 71 kg nune’e mos Boxista nain rua seluk mak hanesan Eligio Raimundo Gaio sei kompete iha klase 60 kg, no mos Alexandre Milino ho klase 63.5 kg.
JHD
