DILI– Ekipa Futsal Mane hosi Ministeru Obras Publika (MOP) susesu hadau bileti ida hodi kontinua hakat ba meias finais hafoin festa golu ba rede Polisia Nasional Timor Leste (PNTL) ho score 6-1 iha kuartu finais Taxa 3 de Marsu 2024.
Jogu entre ekipa rua ne’e hala’o iha kampu multifunsaun Bebora Dili Domingu (25/02). Jogu ho sistema bota fora ka lakon sa’i halo ekipa rua ne’e hala’o jogu ho kuidadu tebes desde inisu jogu maibe ekipa MOP ne’ebe mak hala’o jogu ho agresivu konsge fura uluk rede PNTL iha minutu 5 liu hosi jogador Tomas Lopes hodi muda score sa’i 1-0.
MOP hasae tan score ba 2-0 iha minutu 8 liu hosi asaun Cirilio Verdial, golu ne’e halo ekipa MOP jogu ho ofensivu liu tan maibe to’o termina jogu primeira parte score 2-0 mantein la muda.
Kontinua ba jogu segunda parte ekipa MOP hasae liu tan sira nia ritmu jogu hodi lansa kontra atake hasoru PNTL ho nune’e jogu foin tama ba iha minutu 22 Salvador Carlos lori ekipa MOP lidera ho score 3-0.
Tama ba iha minutu 25 MOP kontinua haboot tan score sa’i 4-0, liu hosi asaun Cirilio Verdial.
Ho golu ne’e halo ekipa PNTL hahu jogu ho agresivu hodi lansa kontra atake no Tama ba iha minutu 29 Salvador Carlos fura Tan rede PNTL hodi haboot Liu Tan score sa’i 5-0.
Golu Salvador Carlos nia ba daruak ne’e liu hosi suta livre no Guarda rede la konsege antispa no bola tama direta.
To’o Tama ba iha minutu 38 PNTL ne’ebe mak jogu agresivu hodi komete eru ba dala lima ikus mai arbitu deside hodi fo second penalti ba ekipa MOP no Juliao Ximenes ne’ebe mak sa’i ezekutor ba penalidade refere susesu fura rede PNTL hodi haboot Liu Tan score sa’i 6-0.
PNTL foin mak hamihis score sa’i 6-1 iha minutu 39, uniku golu hosi PNTL ne’e produs hosi jogador Juvencio.
Ho rezultadu vitoria 6-1 ne’e lori ekipa Ministeru Obras Publika (MOP) hakat ba meias finais Taxa 3 de Marsu 2024
Enkuantu ekipa Polisia Nasional Timor Leste (PNTL) obrigado tenke elimina hosi taxa 3 de Marsu 2024
JHD
