DILI — Ministru juventude desportu arte kultura Nelyo Isaac Sarmento husu ba lideransa FFTL atu realiza Kongresu extraoridinariu ho urjentemente atu hamosu fila fali konfiansa hosi FIFA, AFC no AFF.
“Ha’u husu ba lideransa FFTL daudaun ne’e buka dalan urjente para oinsa realiza fali kongresu FFTL nian atu nune’e hamosu fila fali konfiansa FIFA, AFC no AFF ba Timor-Leste iha nivel Asean, Azia no internasionál” Dehan Nelyo Isaac Sarmento ba jornalista sira iha edifisiu MJDAK Lecidere, Dili Kinta (11/01/2024).
Governante ne’e hatete, Kanselamentu kongresu FFTL bá da IX ne’e prejudika tebes ba FFTL agora tanba klaru katak apoiu finanseiru husi FIFA sei la mai tan depois ema nain hira servisu FFTL mos sei lakon oportunidade.
Ministru hatutan, tuir informasaun nia hetan kona kongresu FFTL kansela ne’e komisaun eleitoral la halo tuir desizaun komisaun rekursu hasai maibe tuir lolos komisaun rekursu mak as liu iha lalaok eleisaun kongresu FFTL nian no karik iha membru ezekutivu FFTL balun iha interese ba kandidatu prezidente FFTL entaun sira baralla buat hotu la iha konsistensia lidera meza kongresu nune’e buat sira ne’e hatudu imajen Timor-Leste nian la diak ba internasional tanba foin daudauk kongresu ne’e marka prezensa mos reprezentante husi FIFA, prezidente AFC no sekretariu jeral AFF, sira mai tanba Timor-Leste nune’e sira mai akompaña kongresu ne’e.
Tuir nia, karik ema sira hakarak ne’e tuir lolos aktu ne’e la akontese maibe tanba sira la iha pensamentu diak katak futebol Timor-Leste integra iha mundu nune’e iha jogu barak obrigatoriu Timor-Leste tenki partisipa maibe tanba grupu ka ema ida rua nia egoismu halo baralla buat hotu iha kongresu.
Nia akresenta, aktu kongresu federasaun futebol iha nasaun hotu mai kedas padraun husi FIFA katak ne’e iha regra atu halo tuir bainhira federasaun futebol ida halo kongresu hanesan FFTL nian nune’e orgaun ida ne’ebe mak lidera eleisaun ne’e mak komisaun eleitoral no rekursu bainhira aktu ruma iha eleisaun lalos membru iha direitu atu hatama rekursu.
Antes ne’e iha Loron kuarta 10 fulan Janeiro tinan 2024 FFTL realiza Kongresu extraoridinariu hodi hili lideransa foun maibe tanba la iha seriedade hosi komite eleitoral ikus mai kongresu extraoridinariu ne’e tenke adia ba loron indetrminadu.
JHD
