DILI-hafoin Tinan barak paradu, Mai Sport Zone Gym hamoris fali Kompetisaun basketball durante seman tolu, ho objetivu hakarak promove atleta basketbol sira no kria amizade iha fatin refere liu husi kompetisaun basketebol.
Kompetisaun Basketball refere realiza ho hakarak ba promove atleta basketball no amizade entre atleta. Kompetisaun ne’e sei partisipa husi ekipa 8 ne’ebe kompostu husi ekipa Timoroan, Filipina no Xines.
“Ami agradese tebes ba ekipa ualu husi Timoroan hamutuk ema Filipina no Xina iha fatin ida ne’e ne’ebe ohin ita halo abertura ba kompetisaun basketebol tanba ami hakarak promove atleta basketebol sira hodi kria amizade no unidade liu husi kompetisaun ne’e no halo rame iha ami fatin Mai Sport Zone Gym“, Jerente Mai Sport Zone Gym Anastácio da Costa ba jornalista sira iha fatin kompetisaun Hudi Laran, Díli sabadu (02/07).
Anastácio hatutan, sira agradese mos ba patrosinador sira tanba liu husi kompetisaun iha fatin ne’e sira hakarak anima atleta basketebol sira atu hatudu espiritu amizade, atu nune’e bele kunese malu liu tan husi desportu ne’ebe sira realiza, jogu basketebol ba dahuluk iha sira nia fatin.
Iha fatin hanesan jogador ekipa Aileba Horácio dos Santos hatete, nu’udar atleta sente orgulllu no agradese tanba kompania bele realiza eventu basketebol tanba tinan barak iha Timor-Leste kompetisaun basketebol paradu la iha liga nasional basketebol Timor-Leste.
“Hau nu’udar atleta sente orgulllu no agredese tanba kompania Mai Sport Zone Gym iha inisiativa realiza kompetisaun basketebol ne’e tanba durante tinan barak kompetisaun basketebol iha Timor-Leste lá lao no jogador sira abandonadu tanba dualizmu iha federasaun basketebol iha Timor-Leste ne’ebe mosu obstakulu boot ba liga basketebol rasik.” tenik Horácio
Iha Sorin Seluk jogador ekipa One Heart Ballers Haze dehan, nia apresia tebes ba Mai Sport Zone Gym ne’ebe bele realiza kompetisaun basketebol akumula Timoroan hamutuk ho ema estrajeiru sira bele kunese malu diak liu.
“Hau apresia tebes ba Mai Sport Zone Gym tanba bele realiza eventu ba Timoroan sira hamutuk ho ami estrajeiru sira husi Filipina no Xina ne’ebe iha paisaun ba basketebol bele kunese malu no halo amizade diak liu entre ami jogador sira“, Haje hateten
Ekipa ualu ne’e kompete iha kompetisaun refere mak ekipa Aileba, One Heart Ballers, Ponta Leste, JOI, Lá Família, SLB, Dragon Team no James Electromechanical.
Enkuantu ba kestaun tekniku Mai Sport Zone Gym hetan Apoiu husi Federasaun Nasional Basketball Timor Leste.
ADS
