DILI- Federasaun Futebool Timor-Leste sei realiza kongresu ordináriu iha loron 11 fulan-janeiru 2025, hodi kompleta hikas estrutura FFTL periodu 2022-2026 ba restante mandatu ne’ebe hetan rezignasaun husi Prezidente FFTL no Membru Komitê Ezekutivo na’in ida (1) husi sira-nia kargu iha Kongressu Extraordinariu FFTL ne’ebe hala’o iha loron 10 novembru 2023, ho núne’e prezidente Asosiasaun Treindor Futebool Timor-Leste (ATF-TL) Van Basten Koy, deklara, nia parte sei fó votu konfiansa ba eis-prezidente Liga Futebol Timor-Leste (LFTL), Nilton Telmo Gusmão dos Santos, ne’ebé mak nu’udar pioneiru ba dezenvolimentu Futeból iha Timor-Leste hahú ho Liga Futeból Amadora (LFA) to’o transforma ba Liga Futeból Timor-Leste (LFTL) ne’e hodi lidera FFTL atu bele hasai futebol Timor sa’i hosi nakukun.
Dalan ba Kongresu Ordináriu FFTL ne’e Asosiasaun sira propoin ona kandidatura potensial na’in rua mak hanesan, eis-prezidente LFTL, Nilton Telmo Gusmão dos Santos no
Diretor Ezekutivu DIT FC, Estanislau A. Baptista.
Tuir Van Basten, tempu ona FFTL lidera husi ema ne’ebe maka iha hanoin inovativu ho kualidade ne’ebé maka Investe ona nia Rekursu tomak ba iha Futebol rai ida ne’e ho Paixao ne’ebe maka ass tebes hodi nune’e bele reforma no transforma Futebol rai ida ne sai orgullu Nasional ba Povu Timor Tomak.
“Ami la dúvida ho sr. Nilton Gusmão nia lideransa ba FFTL Iha tinan 2025-2026 tamba ami ATF-TL maioria konhese no hatene muito bem Sr. Nilton Gusmão nia paixao ba futeból rai ida ne’e hahú husi 2004 to’o 2024, ami ho konfiansa tomak fiar katak maske tinan ida de’it maibé ho Nilton Gusmão ita sei la dolar hanesan lenuk no ami mos hatene sei la semo hanesan Avião maibé ami fiar Nilton Gusmão sei halo saida mak soceidade hadomi na’in futeból hotu nia hakarak” Prezidente ATF-TL Van Basten Koy ba JHD domingu (22/12).
“Tamba ne’e hodi membrus estruturas ATF-TL no treinadores senior sira nebe maka maioria eis-joagdores selesaun nasionál ne’ebé maka senti triste no terus ba futeból rai ida-ne’e durante tinan 20-resin, ami deklara fó ami-nia votu konfiansas ba Sr. Nilton Gusmão iha Kongresu Ordináriu FFTL loron 11 janeiru 2025” tenik nia.
Entertantu asosiasaun sira ne’ebé mak iha direitu atu vota iha Kongresu Ordináriu ne’e hamutuk 21 asosiasaun membrus mak hanesan, Asosiasaun Futeból Dili Leste, Díli Oeste, Manufahi, Manatuto, Baucau, Lautém, Viqueque, Ermera, Likisa, Bobonaro, Covalima, Aileu, Ainaro, Oe-cusse, Asosiasaun Arbitragem, Asosiasaun Treinador, Asosiasaun Futsal, Asosiasaun Futeból Feminino, Asosiasaun Juvenil, Kampiaun Primeira Divizaun Karketu Díli FC no kampiaun segunda divizaun DIT FC.
JHD
