Dili – 07/11/2021 udan no anin akonpaña jogu jornada da-4 entre Klubu Nagardjo Fc no klube Lica Lica Lemorai fc. Iha ne’ebé klube Nagardjo Fc iha motivasaun diak hodi manan jogu refere, atu nune’e bele iha opurtunidade hodi hakat ba primeira divizaun.
Apitu lian naruk iha 16:00 otl, hatudu jogu akontese daudaun. Nagardjo foti inisiativa hodi domina jogu durante hodi lansa atake husi area oin-oin ba baliza adversariu nian. Esforsu hirak ne’e hetan resposta iha minute 16, bainhira jogadór Benditu Ximenes ho númeru kamizola 10 aproveita assist husi mediu hodi suta golu. Nagardjo lidera 1- 0.
Golu refere harame liu tan atmosfer iha Stadion Munisipál Díli, tan komesa akontese kontra-atake entre klubu rua. Hafoin iha minute 35 jogadór Nagardjo FC Bovio Soares hetan kartaun kinur. To primeira parte termina Nagardjo kontinua lidera ho score 1-0.
Lakon golu ida Primeira Parte, Lica-Lica Lemoria Fc hahu segunda parte ho agresivu liu tan. Ho mudansa taktika ne’ebé sira halo konsege fo presaun ba Nagadjo Fc. Iha ne’ebé ikus mai presaun hirak ne’e halo Lica-Lica Lemorai Fc konsege halo empata, liuhosi jogadór Miguel Barreto ne’ebé aproveita jogadór Nagardjo fc nia sala hodi suta golu iha minutu 60. Nune’e konsege muda score 1 -1.
Ho mudansa score ne’e hasae liu tan intensidade jogu no atmosfer adeptus sira-nian, to akontese asidente ne’ebé fo rajaun atu arbitu foti kartaun kinur ba jogadór Bendito Ximenes no Marco Gusmão iha minute 87 no 90 + 1, enkuantu ba jogadór Lica-Lica Lemorai ho naran Nilton de Carvalho iha minute 68.
To Jogu termina score nafatin 1 – 1, nune’e Nagardjo fc no Lica Lica Lemorai Fc laiha dalan atu ba joga iha primeira divizaun epoka 2022 maske sei hela jogu ida, tamba hetan pontu 4 no Lica-Lica Lemorai Fc hetan deit pontu 3, enkuanto posizasaun primeiro Group B okupa husi Atletico Ultramar ho pontus 10 no Emmanuel Fc ho pontus 9 okupa posizasaun Segundo.
Nagardjo FC
Celestino Pinto, Bovio Soares, Januario Fernandes, Marco Gusmao, Jose da Costa, Ricardo Pereira, Florencio Pinto, Bendito Ximenes, Alberto Tilman, Chiquito do Carmo
Lica-Lica Lemorai
Luis Mau Bere, Manuel da Silva, Miguel Mascarinhas, Miguel Barreto, Nilton de Carvalho, Nelson da Costa, Henrique da Costa, Francolino Correia, Elias Gomes, Helderico Barreto, Julito Moniz.
Reportajen : Mariana Teresa Do Carmo
