DILI-Federasaun Nasional Basketbol Timor-Leste sei apoiu tekniku ba Mai Sport Zone Gym ne’ebe iha inisiativa realiza kompetisaun basketbol ho modelu 3 vs 3 ne’ebe sei realiza iha loron 2 to’o 26 fulan Jullu tinan ne’e.
Antes ne’e, kuaje tinan tolu nia laran publiku Timor Leste, liu-liu Díli la divertidu ho atividade jogu basketball. Nune’e, iha tinan ida ne’e entidade individual Mai Sport Zone Gym kopera ho Federasaun Nasionál Basketball Timor Leste hodi apoiu malun organiza kompetisaun basketball loron 21.
“Objetivu ami hasoru malu ho FNBTL atu kolabora ho federasaun atu apoiu tekniku ba ami-nia kompetisaun basketebol iha Mai Sport Zone Gym atu nune’e kompetisaun bele realiza ho susesu to’o remata. ne’ebe oras ne’e klube sia mak rejistu ona no ami nia kompetisaun sei realiza iha loron 2 to’o 26 fulan jullu tinan ne’e“, Anastácio hateten.
Enkuantu, parte FNBTL konsidera ida ne’e nu’udár loron istoriku ida tanba badahuluk entidade individual ida hakarak promove no dezenvolve modalidade ne’e iha Timor Leste. Tan ne’e, sira sei fo apoiu tekniku.
“Ohin ba ami rezista hanesan loron istoriku tanba ba dahuluk entidade individual realiza kompetisaun basketebol atu suporta modalidade ne’e iha Timor-Leste. ne’ebe ami fo bemvindu ba Mai Sport Zone Gym, ne’ebe ami sei apoiu tekniku, mak regulamentu jogu no arbitrajen” Vise prezidente FNBTL Madalena ba jornalista sira iha nia knaar fatin Jinaziu desportu Díli Caicoli, Díli kuarta (29/06).
Vise Prezidente hatutan, sira haksolok tebes tamba entidade individual hakarak koopera ho FNBTL atu dezenvolve basketebol iha Timor-Leste karik kompetisaun diak hein katak entidade individual bele tau ba sira nia ajenda kada tinan.
Klubu 9 ne’ebé daudaun ne’e rejistadu iha Mai Sport Zone Gym kompostu ekipa haat husi jogador lokal sira, ekipa tolu husi sidadaun Filipina no ekipa rua hus sidadaun Xina. Rejistasaun sei kontinua lao hela no sei remata iha loron 30 fulan junu 2022.
ADS
