DILI– Sekretariu Jeral Federasaun Boxing Amadora Timor Leste (FBATL) Rogerio Amaral Soares, garante Boxista nain haat (4) ne’ebe mak atu kompete iha Asian Games ba edisaun XIX iha Hangzhou China ne’e sei hamorin Timor Leste nian naran.
Fiar aan ne’e Sekretariu jeral FBATL hato’o laos sein razaun maibe tanba haree ba perparasaun treinamentu ne’ebe mak Boxista nasional sira halao hafoin fila hikas hosi eventu Asian games iha Kambodia hodi deskansa deit semana rua hodi halo hikas perparasaun treinamentu ba eventu Asian Games 2023.
“Hosi Federasaun Boxe atu perpara ekipa nasional ba Asean Games, ami depois de Sea Games Kambodia fila atleta sira deskansa semana rua deit, atelta sira halo kedas perparasaun para atu ba fali Asian games iha China, maibe perparasaun durante ne’e tuir kbiit ne’ebe mak federasaun iha” dehan Sekretariu jeral FBATL ba jornalista sira iha Benifica Dili, Kinta (20/07).
Boxing rasik sei kompete iha Asian Games 2023 nee ho nia Boxista selesionadu nain haat (4).
“Ba sira nain 4 ha’u iha esperansa, ami ba ho optimis, ami ba ho ambisi, ami optimis fila ho medalla tanba haree hosi ami nia preparasaun ne’e katak prontu ona atu bele kompete iha kualker eventu” dehan Sekretariu jeral ne’e
Atleta nain 4 ne’ebe mak atu ba kompete iha eventu Asian Games ne’e mai hosi klubu Oriental Boxe, mak Boxista Eligio Raimundo Gaio ne’ebe mak sei kompete iha klase 60 kg, no Alexandre Milino ho klase 63.5 kg, ida hosi klubu Benifica Boxe mak Boxista Edgar Foe Quintas klase 54 kg, no ida mai hosi klubu EL MATADOR Boxing mak Delio Anzaqeci Mouzinho klase 71 kg.
Sekretariu jeral ne’e explika, Boxista nain haat 4 ne’e iha diretu absoluta hodi reprezenta Timor Leste, tanba antes ne’e sira mak liu selesaun hodi ba kompete iha sea games Kambodia.
Entertantu Asian Games edisaun XIX iha Hangzhou China ne’e sei abertura iha loron 23 fulan setembru ne’e no sei termina iha loron 8 Fulan agustu tinan ne’e.
Eventu ne’ebe mak realiza kada tinan 4 dala ida ne’e sei partisipa hosi nasaun hamatuk 45 inklui Timor Leste rasik no kompete iha modalidade desportiva hamatuk 40.
Enkuantu Timor Leste rasik sei kompete iha eventu Asian games ne’e ho modalidade desportiva hamatuk (9) mak hanesan, Taikondow, Karate-do, Boxe, Natasaun, Badminton, Atletismu, Voleybol, Facuptil no seluk tan.
JHD
