Díli – Prezidente Asosiasaun Futeból Díli-Oeste (AFDO) hateten depois de hala’o diskusaun ba-dala hira ho kandidatu Prezidente Ezekutivu FFTL Nilton Telmo Gusmão dos Santos ligadu ho vizaun sira ba dezenvolvimentu futeból nian, iha asuntu lubuk ida maka ami to’o pontu convencido katak, ami iha vizaun hanesan ba dezenvolve bola Timor-Leste.
Haré ba dezafius oioin ne’bé ita infrenta durante ne’e ho hanoin ida katak tempu ona atu ita tenki salva, asegura no hadi’a FFTL para bele dezenvolve futeból Timor-Leste em jerál. Senhor Nilton Gusmão iha komitmentu maka’as no iha planu adequadu atu bele atinje pontus hirak ne’ebé mensiona iha leten, Ipólito Soares hato’o lia hirak ne’e ba jornalista JHD via WhatsApp Tersa (02/12/2024).
“Ami aseita malu, tenki iha diverjénsia ideas ligadu ba prosesu demokrátiku ida maibé ba intereses komúm no ba futeból Timor-Leste ita tenki hamutuk ho hanoin ida. Entidades, grupu ka pesoál tenki barani unidu atu asegura instituisaun bola hanesan FFTL no lori futeból ba oin ba Timor-oan tomak ne’ebé iha paixão bo’ot tebes ba modalidade desportu ida-ne’e.”
Kuaze tinan 20-resin ona FFTL afilia nu’udar membru ba organizasaun futeból rejionál no mundiál mas ita seidauk atinje saida maka povu Timor-Leste mehi ba, tamba FFTL seidauk servisu másimu no seidauk kompriende lolos saida de’it maka ninia objetivu prinsipál. Atu ultrapasa obstacolos hirak ne’e instituisaun reguladór futeból tenki iha planu serteza no klaru para bele atinje ninia objetivu tolu (3) mais importante mak hanesan; primeiru; atu prepara 11 jogadores iha respectiva equipa nian tanto fízikamente, teknikamente no mentalmente atu kompete iha 90 minutus nia laran, segundu; Regula ho profisionál kualker atividades futeból iha rai-laran, terseiru; lidera no fó asisténsia maka’as ba asosiasaun membru sira hanesan 14 Asosiasaun Munisipál, 5 Asosiasaun Profisionais no clube sira, nia akresenta.
Prezidente AFDO ne’e sujere mos ba governu atu tau atensaun másimu liután ba futebol no iha liña kordenasaun servisu di’ak ho FFTL hodi realiza programa no planu konkretas ba dezenvolvimentu futeból iha ita-nia rain, bele responde necesidade ba joven sira iha área refere no garante katak governu sei apoiu no fasilita sem intervensaun.
“Ha’u espera aleinde komitmentu ne’ebé forte no plano ne’ebé adequado Senhor Nilton Gusmão ho ninia disponibilidade tomak iha kualker tempu atu servisu ba dezenvolvimentu futebol no sei konsidera futebol nu’udar nececidades principal la’ós hanesan hobby, atu nune’e bele garante funsionamentu FFTL bele la’o ho di’ak iha futuru”, nia hakotu.
Enkuantu kongresu ordináriu FFTL kona-ba hili Prezidente Ezekutivu FFTL no membru Ezekutivu ida (1) hodi kompleta mandatu restante ba periodu tinan 2022-2026 sei realiza iha loron 11 janeiru 2025, no iha kandidatu na’in rua (2) maka sei kompete hanesan Nilton Telmo Gusmão dos Santos no kandidatu ida seluk nia ekipa susesu sira rejeita atu públika naran ba públiku.
