DILI – Ministeru Joventude Despotu Arte no Kultura (MJDAK) Nelyo Isac Sarmento informa, atu Reativa hikas ensinu aprendizajen no pratika arte marsiais depende ba attitude organizasaun Arte Marsiais (OAM) rasik.
Komisaun Reguladora Arte Marsiais (KRAM) ofisialmente termina refiskalizasaun ba OAM tolu Ikatan Keluarga Silat Putra Timor Leste (IKSPTL), Kmanek Oan Rai Klaran (KORK) no Persaudaraan Setia Hati Terate (PSHT) hodi aprezenta ona ba Ministru Joventude Despotu Arte no Kultura ho Ministeru Interior ne’ebe antes Governu fó kompetensia atu haree no halo fiskalizasaun no monitorizasaun hodi bele hatene lalaok atividades Arte Marsiais nian.
Monitorizasaun no fiskalizasaun ba OAM ne’e bazeia ba Rezolusaun Governu N.º 45/2023 loron 10 fulan Novembru, hodi suspende kona-ba ensinu, aprendizagen no pratika artes Marsiais ho adosaun (ka foti) medidas hodi assegura ordem publika.
Iha intervista Minstru Joventude Despotu Arte no Kultura, (MJDAK) Nelyo Isac Sarmento, informa, KRAM halo ona sira-nia fiskalizasaun ba to’o ona iha sentru treinamentu arte marsiais sira, hodi hatene kona-ba problema artes marsial nian, hahú kedan husi sira-nia organizasoens toó iha sentru treinamentu, maka ohin KRAM mai hato’o relatórius kona-ba sira-nia fiskalizasaun durante ne’e.
Govenate ne’e dehan, Ministeru Interior ho MJDAK haree hamutuk asuntu ne’e, halo analiza kle’an liu tan, hodi bele aprezenta ba governu kona-ba problema artes marsiais nian iha futuru.
“Kuandu sira prosesu lao di’ak, sira-nia attitude di’ak, Governu la bandu ba asosiasismu iha rai ida-ne’e, la bandu Assosiasaun sira atu harii iha nasaun ida-ne’e, ne’ebé depende ba sira-nia karakter organizasoens, no mos sira nia attitudes nu’udar sai membrus iha organizasoens, atu trasa sira-nia programa ba oin” dehan Nelyo ba jornalista sira iha edifisiu Ministeru Interior vila verde Dili Kinta (08/02).
“Rekomendasoens Arte marsiais ne’e, ha’u seidauk detallu atu hatete ba ita-boot sira, tanba presiza analiza di’ak liutan, kona-ba rekomendasoens sira ne’ebé iha, klaru katak rekomendasoens sira ne’e la halai husi aktividades ka grupus arte marsial, liuliu kona-ba individus, individus ne’e katak, ema sira ne’ebé envolve arte marsiais, liu haree kona-ba organizasoens , ne’e mos to’o iha sentru” ezekutivu ne’e haktuir.
Iha fatin hanesan Francisco da Costa Guterres, haktuir, Depois de KRAM aprezenta Rezultadu refiskalizasaun, ba OAM Arte Marsiais MI hamutuk ho MJDAK, sei haree asuntu ida ne’e no diskute hamutuk, molok aprezenta ba iha Konsellu Ministru hodi haree kona-ba kontribuisaun Arte Marsiais nian ba estadu nian mak saida.
“Ita kontribui ba estadu, katak kontribui ba dezenvolvimentu paz no Seguransa Ida ne’e Mak importante ba estadu Ida ne’e” dehan Ministru Interior Francisco da Costa Guterres.
JHD
