Dili-08/11/2021, akontese daudaun jogu jornada ba da-20 Pra-Liga Futsal Timor – Leste 2020-2021, entre Klubu Mauputar Fc kontra Boa Sorte Fc. Jornada ida ne’e sei lao ho agresivu tebes, tanbá Mauputar Fc tenki hakas an hodi hetan pontus kompletu, nune’e bele press nafatin Mushila Fc iha pozisaun segundu ba tabela klasifikasaun provizoriu. Iha sorin seluk, Boa Sorte tenki aproveita Bekusi United nia derrota husi Ramelau Fc hodi bele menan iha enkontru ida ne’e, atu nune’e bele hadia sira-nia pozisaun iha tabela klasifikasaun provizoriu no habadak diferensiasaun pontu ho Mauputar Fc.
Iha minute 10 primeiru, Mauputar Fc apresenta nia superioridade hodi domina jogu hodi aproveita lansa atake ba rede Boa Sorte. Hafoin iha minute 12 mak Mauputar Fc lidera score 1 – 0 liuhosi servisu hamutuk entre Mario Moniz ho numero kamizola 5 ne’ebé pasa bola ba Davidson Lopez ho numero kamizola 77 hodi marka golu ho suta makas ida iha rede. To primeira parte remata la akontese tan golu ruma, nune’e Mauputar Fc kontinua lidera ho score 1 – 0.
Lakoi hakruk deit ba Mauputar Fc maka Boa Sorte hahu segunda parte ho mudansa taktika nune’e konsege halo balansu ba jogu liuhosi golu ne’ebé Reinaldo Alves halo iha minute 21, score muda ba 1 – 1. Ho golu refere hasae liu tan intensidade jogu nian, nune’e dala ida tan Davidson lori Mauputar Fc lidera jogu liuhosi golu ne’ebé nia marka iha minute 26. Score 2 – 1 la augenta kleur, liu deit minute ida Reinaldo Alves hatama tan golu ba rede Mauputar Fc hodi muda score 2 – 2.
Mauputar Fc ne’ebé jogu ho motivasaun boot ba manan la presija tempu naruk hodi lidera jogu, liu deit minute 5 Mauputar Fc soe golu rua ba Boa Sorte Fc liuhosi nia jogadór Ruben Faria ho numeru kamizola 10 liuhosi golu ne’ebé nia halo iha minute 29 no minute 32, ho nune’e Mauputar Fc lidera ho Score 4 – 2.
Ho superioridade ne’ebé Mauputar Fc iha, maka jogadoór Nivaldo Mesquita ho numeru kamizola 23 mos hatama nia naran iha festa golu kontra Boa Sorte Fc liuhosi golu iha minutu 39. To jogu termina Mauputar Fc manan ho socre 5 – 2.
Iha Fatin ne’ebé hanesan Capitaun Anto Soares husi klubu Boa Sorte Hateten, “iha jogu nia laran sira ladún iha preparasun ne’ebé di’ak tanba tarde ka la on time. Nia hatutan,ba oin hamutuk ho ekipa sei esforsu no treinu di’ak iu tan nune’e la bele lakon tan iha oportunidade tuir mai.“
Reportajen: Mariana Teresa do Carmo
