DILI — Eis-Prezidente Liga Futebol Timor-Leste (LFTL) Nilton Telmo Gusmão dos Santos, deklara, Nia la Presija figura tuan sira hosi Federasaun Futebol Timor-Leste (FFTL) atu prepara kondisaun ba nia kona-ba oinsa atu lidera FFTL, maibé nia prefere liu hetan konfiansas máximu hosi asosiasaun sira para ba lidera FFTL, ne’e nu’udar responsabilidade bo’ot ida ba nia, tanba atu lidera FFTL la’ós buat ne’ebé difisil maibe xave prinsipál mak lideransa tenke iha duni vontade no planu oinsá atu dezenvolve futeból sa’i orgullu nasionál.
Nilton Gusmão hato’o asuntu ne’e hodi hatán ba deklarasaun hosi eis-jogador nu’udar mós eis-estrutura FFTL Mariano Santa, iha programa Grande Entervista GMNtv loron kinta (29/02/2024) katak, entre figura rua ne’e figura ida mais veteranu no ida figura foun, imi rua lalika ba kompete ona Francisco Kalbudi rasik mós idade ona. Figura di’ak ida potensiál tebtebes hanesan Nilton, mai imi rua serbisu hamutuk, para Francisco Kalbuadi prepara hela o ba, to’o tempu nia husik, o bem preparadu tiha ona.
“Dehan atu prepara ha’u, prepara ida oinsá ne’e? nusá la ko’alia ba sira-nia an de’it atu Francisco Kalbuadi prepara sira ba lidera FFTL? Ema seluk inklui Mariano Santa mak sei presija ema apoiu sira karik, ha’u la presija ema ida atu mai prepara ha’u tan de’it atu lidera FFTL. Lidera FFTL la’ós buat ida difisil, ne’e kestaun vontade maioria, boa governança, paixáo no planu oinsá atu dezenvolve ita-nia futeból sa’i orgullu nasionál” dehan Nilton Gusmão ba JHD via WhatsApp Sábadu (02/03/2024).
“Ha’u hakarak lidera FFTL tan iha vontade maioria sosiedade nian ne’ebé apoia. Ha’u hanoin atu ba lidera FFTL tan ha’u iha komitmentu atu hadi’a no halo boa governança iha FFTL atu subsídiu sira ba duni intereses atividades futeból em vez de ba intereses individuais ka grupu nian” Nilton hatutan.
“Ha’u decide avança ba kompete kargu Prezidente Ezekutivu FFTL tan iha hanoin di’ak barak ne’ebé hale’u ha’u, ne’ebé tinan barak no senti dezenvolvimentu futeból la’o estagnadu no prátika falsifikasaun ne’ebé hamoe ita-nia país nia imajen iha mundu internasionál” tenik Nilton.
Rekorde fali katak, antes ne’e mosu dezentendimentu hierarkuia no rezulta ba dualizmu hosi Asosiasaun Árbitrajem Futeból Timor Leste (AAF-TL), Asosiasaun Futeból Ramelau Ainaro (AF-RAMA) no Asosiasaun Futeból Viqueque (AFV) iha kongresu órdináriu FFTL ba-dala IX, 10 janeiru 2024.
Ho Nune’e Prezidente Interino FFTL Tenente-Jenerál Domingos Raul “FALUR RATE LAEK” ho membrus Komité Ezekutivu FFTL deside kansela kongresu refere no husu ba asosiasaun tolu (3) ne’ebé mosu dezentendimentu atu bele realiza kongresu internál hodi rezolve disputa ne’e, no membrus Ezekutivu FFTL sei kria reuniaun para bele halo deliberasaun ba kongresu tuir mai.
JHD
