DILI– Ekipa Voleibol feto hosi Atone Ambeno susesu halakon nia ekipa adversariu Loron Matan PNTL ho score 3-2, iha Jogu kontinuasaun kompetisaun Voleibol, Juventude mudansa Cup 2022, iha faze apuramentu.
Jogu entre loron matan PNTL ho Atone Ambeno ne’e hala’o iha kampu Voleibol Ginaziu Desportu Dili (GDD), segunda (26/09).
Iha inisiu set dahuluk ekipa rua hotu hotu lansa bola baku di’ak hodi buka pontus maibé sorti di’ak monu ba ekipa Atone Ambeno hodi manán set dahuluk ho pontus 25 kontra 21.
Kontinua ba set daruak maske ekipa Loron Matan PNTL sofre derota uluk iha set dahuluk maibé la hamate sira nia espiritu kompetetivu hodi responde hikas iha set daruak ho pontus 26 kontra 24.
Kontinua ba set datoluk ekipa loron matan kontinua manán nia ekipa adversariu Atone Ambeno ho pontus mihis 27 kontra 25.
Kontinua ba set dahaat nu’udar determinasaun ba vitória hosi ekipa loron matan PNTL nian maibé ekipa Atone Ambeno susesu responde hikas ho pontus boot liu 25 kontra 19 ho rezultadu empata 2-2. Ne’e obriga ekipa rua tenke hakat ba iha set dalimak.
Iha set dalimak ne’e nu’udar determinasaun ba vitória Atone Ambeno susesu konkista vitoria hafoin manán ho pontus 15 kontra 9.
Entretantu jogu ne’e ho objetivu atu komemora loron konsulta populár ba dala 23 ne’ebé mak monu ona iha loron 30 fulan agostu 2022.
CharllY Junior
