DILI– Prezidente Federasaun Boxing Amadora Timor-Leste (FBATL), Januario Brites informa, razaun Boxista Timoroan nain 4 la kompete iha Asian Games Hangzhou China laos tanba la priense kriteria maibe tanba la simu informasaun mais detallu konba technical meeting nian husi Komite Olimpico Nasional Timor Leste (CONTL).
“Ami hakarak klarifika ba publiku katak boxista nain haat la kompete Asian Games 2023 iha Hangzhou, China laos ami la priense kriteria maibe tanba ami la rona informasaun klaru technical meeting nian husi CONTL hodi nune’e ami to’o China tarde hodi la tuir technical meeting no rejista boxista sira naran, ne’e duni boxista sira la tuir jogu laos tanba problema iha rekezitu ne’ebe CONTL fo sai publiku antes ne’e”, prezidente FBATL Januario Brites lekar sa’i liu husi aprezentasaun relatoriu ba CDTL iha edifisiu CDTL Caicoli, Dili Segunda (16/10/2023).
Prezidente FBATL ne’e afirma, tuir orariu jogu ne’ebe mak modalidade boxing simu husi CONTL katak modalidade Boxing aranka iha loron 21 fulan setembru 2023 ba Bali depois loron 22 fulan setembru 2023, kontinua viagen ba Singapura to’o China maibe iha loron 22 fulan setembru 2023 komisaun organizador Asian Games halo ona technical meeting ba modalidade boxing iha Hangzhou, China no tuir lolos technical meeting sira hatene iha loron 23 fulan setembru 2023 maibe iha mudansa ba orariu Teknikal Meeting mai fali iha loron 22 fulan setembru 2023 hodi nune’e ekipa FBATL to’o tarde, sira la hetan informasaun konba ba mudansa orariu technical meeting tanba halo viajen hela la hetan informasaun husi CONTL ba ida ne’e.
Iha fatin hanesan sekretariu jeral FBATL Rogerio Amaral konfirma katak, iha modalidade boxing technical meeting mak check atleta sira nia kondisaun no presiza mos tenki asina formulariu balun bolu responsabilidade klube nune’e la tuir technical meeting boxista la kompete Asian Games laos tanba la priense kriteria la hatama medical record nian.
“Iha modalidade boxing iha technical meeting presiza mos tenki asina formulariu balun ita bolu responsabilidade klube para atu nune’e boxista hetan tuku makaas labele kontinua jogu treinador ami bele soe toalla ba rin laran ka boxista hetan sansaun arbitrajen hapara nia iha rin, dokumentu sira ne’e presiza asina husi ofisial ka treinador laos boxista la priense kriteria la hatama medical record, boxing ne’e tuir technical meeting mak bele check atleta sira nia kondisaun“, informa Rogerio hodi fo hanoin ba Ema hotu
“kona aprezenta relatoriu saúde ba organizasaun boxing internasional ne’e boxista sira foin fila husi kompete Sea Games 2023 iha Cambodia, seidauk to’o fulan para aprezenta medical record ba organizasaun boxing internasional no medical record boxista sira lori hela bainhira tuir technical meeting mak foin bele aprezenta maibe sira tarde la tuir technical meeting hodi nune’e atleta sira labele kompete Asian Games 2023 iha Hangzhou, China” Nia explika
Antes ne’e vise Prezidente CONTL Mateus da Cruz, esklarese ba públiku katak boxista la joga ne’e la’os sala hosi CONTL maibe tanba sira laiha relatóriu administrasaun ba Federasaun Boxing Internasional, FBATL laiha record ida para hato’o ba Federasaun Boxing internasionál. No CONTL rasik fo hatene antes ba kada Federasaun, maibe sira ladun tau atensaun.
Mateus afirma tan, sira-nia problema ne’e tanba laiha record mediku nian no laiha tan kona-ba anti dopazen nian, no iha mos problema sira kona-ba dokumentu administrativu balun FBATL tenke kompleta mais dokumentu sira ne’e tahan ida deit mos iha federasaun internasionál laiha.
Entertantu hosi modalidade Boxing rasik ba ho iha eventu Asian games ne’e ho atleta nain 4 Mak hanesan Delio Anzaqeci Mouzinho, Alexandre Freitas, Edgar Foe Quintas, no Elisio Gaio.
Timor Leste rasik Kompete iha eventu Asian games ne’e ho modalidade hamutuk 10 no modalidade hotu kuaze la hatudu rezultadu diak iha eventu refere.
JHD
