DILI-Ministru Joventude Despotu Arte no Kultura (MJDAK) Nelyo Isac Sarmento hatete, tempu ba Ikatan Keluarga Silat Putra Timor Leste (IKS-PTL) Kera Sakti atu hadomi malu no haree hanesan maun alin.
Ministru Joventude Despotu Arte no Kultura (MJDAK) Nelyo Isac Sarmento hato’o lia hirak ne’e iha abertura Kampeonatu Nasional IKS PTL nian ba dahuluk ne’ebe realiza iha Ginazio Despotu de Dili (GDD) Kinta, (19/10).
“Tempu ona ba IKS hadomi malu haree malu hanesan maun alin” dehan Ministeru Nelyo hodi enkoraja atleta IKS-PTL.
“Ami hotu ohin prezensa iha ne’e ami hakarak sa’i testamuna importante ba Istoria IKS iha Timor Leste, tanba ho eventu ida ne’e, primeiru eventu kompetisaun nasional IKS Timor Leste atu hamosu atleta ne’ebe iha prestasaun i lori ami orgullu ba imi nia atividades” tenik nia.
“Ba familia no atleta IKS hotu ne’ebe oras ne’e marka prezensa iha ne’e ha’u espera ami hotu hotu espera, povu Timor Leste hotu espera depois de eventu ida ne’e ami lakohi haree tan ami lakohi rona tan inan aman sira tanis tanba imi nia hahalok” nia afirma.
“Ami hakarak deit ami nia matan been tun bainhira imi fila fali mai fatin ida ne’e tanba imi hatudu imi nia prestasaun Lori publiku Timor Leste ha’u hakarak hato’o liamenon ida ne’e halo ba ami nia matan been sulin tanba imi hetan prestasaun diak lori Timor nia naran iha nivel internasional” dehan nia hodi motiva atleta IKS.
Ministru mos agradese ba estrutura tomak organizasaun IKS Timor Leste ba komisaun organizadora hotu ne’ebe organiza eventu Kampeonatu refere.
“Eventu importante ida ohin, durante tinan naruk imi hatudu imi nia treinu, imi hatudu imi nia Treinador sira hatudu imi nia manten hanorin atleta sira ohin mai pratika iha ne’e” nia hatete
Govenate ne’e hatete, hosi eventu refere atleta sira bele hadia aan, kurizi Sira nia aan ida ne’ebe mak arte IKS ne’e kompleta ona ka seidauk, ne’ebe eventu ida hanesan ne’e mak sira bele halo hadia aan neneik to’o ikus sa’i atleta profesional IKS nian.
“Iha Kampeonatu ida ne’e hanorin buat rua ba ita, ida ita atu konse malu unidu hanesan Timoroan rai ida, rua ba loron ohin ita hotu hotu iha ne’e atu valoriza sportivitas lakon manan laos problema hakarak atu konse malu haforte ita nia nasaun” Nia hakotu.
Entretantu Iha Kampeonatu Nasional IKS PTL nian ba dahuluk ne’e partisipa hosi Sucursal 15 iha teritoriu nasional ho total atleta hamutuk nain 120.
JHD
