DILI– Governu liu hosi Ministériu Juventude Desportu Arte no Kultura (MJDAK), seidauk deside Modalidade no atleta hira mak atu partisipa iha Jogus Olimpikus ba-dala XXXIII ne’ebe mak sei hala’o iha Paris, Franca hahu hosi loron 26 fulan jullu to’o 11 fulan Agustu 2024.
Asuntu ne’e hato’o hosi Ministru Joventude Despotu Arte no Kultura (MJDAK), Nelyo Isac Sarmento ba jornalista sira iha edifisiu MJDAK Lecidere Dili Kinta (29/02).
“Tanba ita boot sira hatene katak fulan jullu tinan ida ne’e ita sei ba partisipa jogu olimpiku iha Paris. Entaun ita konvoka reuniaun ida ne’e atu halo desizoens konaba modalidade saida no atleta hira mak atu ba partisipa iha jogu olimpiku iha paris. Maibe depois de ami halo diskusaun rona mos aprezentasaun husi komite olimpiku Timor Leste no mos CDTL. Komisaun haree katak seidauk to’o iha konkluzaun ida atu deside modalidade hira nune’e mos atleta hira mak atu ba. Kestaun tanba too agora komisaun nasional desportu seidauk simu informasaun husi kada federasaun nune’e mos komite olimpiku CDTL federasaun hira ou atleta hira mak kualifikadu atu ba jogu olimpiku” dehan Nelyo
Givernante ne’e informa, dadaun ne’e iha ona modalidade lima ne’ebe mak antes ne’e hetan bolsa estudu husi Komite Olimpiku Internasional (IOC).
“Modalidade sira ne’e mak hanesan, Taekwondow, Natasaun, Hiit Besi, Atletizmu no Badminton. Sira hetan bolsu estudu husi IOC ba halo preparasaun ba ida ne’eba, Maibe neste momentu ita seidauk iha informasaun kona ba sira nia progresu ne’ebe sira halo” informa Ministru.
“Ita la hatene sira nia prestasaun hanusa tanba ne’e mak komisaun nasional foti desizaun ba kestoens ida ne’e ita seidauk halo destribuisaun pois komisaun nasional sei haruka karta ba komite olimpiku ho CDTL atu federasaun sira hotu hodi hatene loloos kona ba kondisoens interna kada federasaun ninia” dehan Nia.
Rekorda fali katak antes ne’e Komite Olimpiku Internasional (IOC) fo bolsu estudu ba Atleta nain lima atu perpara ba Jogus Olimpikus 2024, liu hosi Komite Olimpico Nasional Timor Leste (CONTL). Atleta hirak ne’e mak hanesan, Jolanio Guterres (Natasaun) Ana da Costa (Taekwondo) Gerson Correia (Hiit Besi), Manuel Belo Ataide (Atletismu), Izoraida Gusmao (Badminton).
Entertantu Eventu Despotu ne’ebe mak hala’o tinan 4 dala ida ne’e sei harame ho Modalidade desportiva 32 mai hosi nasaun 203.
JHD
