Dili-08/11/2021, AFC ho FFTL realiza kursu ba Treinador husi Klubu sira iha Timor Leste durante loron 11, hahu husi 08-18 novembru 2021 iha Xanana Sport Center Dili. Kursu refere realiza ho Tema ” AFC/FFTL B Coaching Course “, ne’ebe realiza ho objetivu atu aprofunda konhesimentu no abilidade Treinador sira nian iha natureza futebol.
Ohin primeiru kursu ba Treinador nain-19 husi Klubu Futebol nasional, ne’ebe fasilita husi Sr Instrutor Gospal Krishna A. S Ramasani husi Malaysia. Iha ne’ebe kursu refere sei sai nu’udar bukae ba Treinador sira atu hetan lisensa nivel B nian.
Tuir, Sr. Instrutur AFC Gopal Krishan A.S. Ramasamy hateten “kursu ida ne’e hanesan meius ida atu hasa’e konesementu treinadores Timor-Leste nian. Nia mos sei fo atensaun makas tamba tuir nia haree treinador sira sei menus liu exersisiu, entaun ho kursu ida ne’e bele ajuda sira aprende ho di’ak”.
Materia ne’ebe Treinadores hetan iha fatin kursu ne’e, fokus liu ba kompetisaun Treinador AFC nian. Treinamentu ne mos fahe ba fase rua(2), primeira fase no segundu faze. Kada faze sei akontese durante loron 11, faze dahuluk Mak Lao dadaun no faze daruak sei akontese iha tinan oin, 2022. Enjeral, kursu refere sei lao ho metodu (2), teoria no pratika, iha aula nomos iha kampo.
Iha fatin hanesan, reprezentante Treinador DIT FC Alexandre informa, “materia ne’ebe hetan iha kursu ne’e, sei implementa ba sira nia klubu no Ida ne’e mos ajuda tebes sira atu prenxe kriteria nune’e bele hetan sertifikadu B, tamba sertifikadu ne hanesan kriteria ida ba klubu sira iha Timor atu ezisti iha liga no liu-liu iha primeira divizaun“.
Enkuantu ba faze daruak, Treinador sira ne’e Mak nafatin tuir hodi bele halo avaliasaun atu nune’e bele haree progresu kursu no dezenvolvimentu treinador sira nian, nune’e bele deside se mak merese atu hetan sertifikasi Treinador nivel B.
Reportajen: Putri & Lidia
