Dili-09/11/2021, Akademia Fc asegura tikete hodi fila ba primeira divizaun. Iha jornada da-4 nian Akademia konsege termina enkontru ho vitoria osan mean.
Jogu la’o entre klubu rua, ekipa ida-idak hahu buka domina kampu, nune’e iha minutu 25 nia laran Zebra konsege domina jogu hodi kria atake oin-oin. Ho difikuldade sira hotu mak resulta husi udan maibe Zebra FC konsege aproveita hodi lidera liuhosi Jogador Estevao Soares ho numeru kamizola 7 nia Golu iha minute 27.
Ho score 0 – 1 refere, hasae liu tan tensaun jogu nian hodi nune’e resulta kartaun kinur ba Jogador Zebra. To primeira parte termina Zebra kontinua lidera ho score 0 – 1.
Tan lakoi kleur iha Segunda divizaun maka Akademia hahu segunda parte ho mudansa taktika. Ho nune’e, konsege lori Akademia ba domina jogu ne’ebe ikus mai konsege halo empata 1 – 1 liuhosi Jogador Juvinal Boavida ho numero kamizola 19 iha minutu 52. Ho nune’e, hasae liu tan esperitu Jogador Akademia Fc nian atu kontinua domina bola hodi halo tentativa oin-oin ba area defeza Zebra Fc nian. Esforsu hirak ne’e hetan resposta iha minutu 80 hodi muda score ba 2 – 1 liu husi jogador Helder Lopes iha minute 80’.
Ida ne’e, halo atmosfer iha Estadio Munisipal Dili aumenta manas, tan Akademia nia Comeback hodi hamonu mentalidade Zebra Fc. Ho nune’e, presija deit minutu 7 tan hodi Akademia haboot tan score ba 3 – 1 liuhosi Jogador Pascoal Fernandes iha minute 87.
Ho resultadu ida ne’e halo Akademia FC la presija tinan naruk hodi fila fali ba joga iha Primeira Divizaun, sira asegura tikete ida. Tan sira sofre degradasaun iha 2019, tinan 2020 Futebol vacum no ikus mai 2021 Akademia Sae fali ba primeira divizaun.
Tuir Treinador Luisinho do Santos husi Klubu Akademika espresa nia sentimentu ba resultadu ida ne’e, “nu’udar treinador sente orugulho hodi fo parabens ba nia jogador sira tanba ho jogador sira nia esforsu bele hakat ona ba primeira divisaun“.
Academica FC: Luisinho dos Santos; Otilio Guterres, Erolismo Martins, Romulo Escorial, Ezaquiel Moniz, Filepe Ling, Helmerino Mendes, Alexandre da Cruz, Joel Gaio, Juvinal Boavida, Deonisio da Costa, Pascoal Fernandes
Zebra Fc: Rogeiro Mok; Berlmiro Belo, Roy Al Fath, Rique Correia, Camilo Pereira, Calistro Pereira, Leonel Gama, Valentim Freitas, Heriberto Guterres, Estevão Soares, Deonicio da Silva, Ireneu Correia
Reportajen: Putri & Lidia
