Dili-10/11/2021, Jogu ikus grup B nian, Atletico Ultramar ho Emmanuel Fc hadau malun pozisaun primeiru, hodi bele hakat ba faze final segundu divizaun. Hodi hein resultadu jogu Fitun Estudante Fc kontra Portu Taibesi Fc. Maske nune’e, Portu Taibesi Fc presija manan ho espasu golu 4 hodi bele ba final kontra Emmanuel Fc.
Ekipa rua hahu jogu ritmu natoon, iha ne’ebé Emmanuel Fc domina jogu desde minute dahuluk. Ida ne’e fo espasu ba sira atu inisia atake ba area adversariu. Ho nune’e, jogadór Alexandre Moreira mak hetan opurtunidade dahuluk hodi lansa suta ida ba guarda rede Atletico Ultrmar ne’ebé konsege salva husi Tito belo.
Emmanuel Fc nia esforsu sira foin mak hetan resultadu iha minute 21, liuhosi servisu hamutuk entre Mario Quintão ne’ebé konsege hadau bola husi jogador Atl. Ultramar hodi pasa direita ba Alexandre Moreira hodi lansa suta makas ida ne’ebé guarda rede la konsege salva, Emmanuel Fc lidera 0 – 1.
Ho golu refere, halo Emmanuel Fc kontinua superior liu tan iha jogu. Nune’e, iha minute 35, Alexandre Moreira lori Emmanuel Fc haluan liu tan espasu golu ba 0 – 2. Liu de’it minutus 2 ( 38 minutus ), Filomeno Savio aproveita bola muta husi Jonatas Pereira nia suta ne’ebé kona kantinu hodi suta golu, score 0 – 3 augenta to primeira parte termina.
Iha segunda parte, Atletico Ultramar nafatin susar atu halo balansu ba Emmanuel fc nia jogu. Nune’e, maka Emmanuel Fc aproveita diak liu tan sira-nia forsa hodi marka tan golu iha minute 59, score 0 – 4. No kontinua haluan espasu golu iha minute 66 liuhosi Filomenio Savio nia golu.
Ho Emmanuel Fc nia dominasaun halo jogador Atletico Ultramar fasil atu halo salah. Nune’e, iha minute 73 jogador Lexi Junior Atok hetan kartaun mean tanbá viola Alexandre Moreira ho tesi ida iha area defeza Atletico Ultramar.
Ho nune’e, halo a Atletico Ultramar inferior liutan iha jogu refere. Iha ne’ebé ikus mai Emmanuel Fc taka festa golu ba Atletico Ultramar liuhosi Zeferino nia golu iha minute 86, to jogu remata Emmanuel manan ho score 0 – 6.
Maske lakon maibé ida ne’e la influensia ba Atletico Ultramar hodi pasa ba primeira diviozaun iha tinan oin. Tuir Treinador Atletico Ultramar Moises Da Silva hateten, “nu’udar treinadór sente tristi uituan maibé ne’e la iha buat ida, ne’e hanesan lisaun ida mai ha’u hodi hadia iha oportunidade tuir mai“
Enkuantu, treinador Emmanuel FC Emilianu da Silva deklara, “ho rezultasu ohin passa ona ba Primeira Divizaun no moz passa ba final, sistema ne’ebé mak prepara ba ami nia jogador sira mak kondisaun fiziku no konsistensia jogu ba joga final nian“.
Atletico Ultramar: Moises da Silva; Tito Belo, Manuel Oliveira, Manuel Soares, Ivan Lay, Florindo Soares, Elias Sanches, Lesy Careca Atok, Lexy Junior Atok, Elvis da Silva, Bonifacio Cabral, Noel dos Santos.
Emmanuel Fc: Emiliano da Silva; Carvalinho Fernandes, Afonso de Carvalho, Alexandre Moreira, Filomeno Savio, Jonatas Pereira, Kevin Fernandes, Mario Quintao, Zeferino Nheu, Carolino Correia, Bernardino Sena, Fretelino dos Santos.
Reportajem : Putry
