Dili-10/11/2021, Jogu pra-Liga Futsal Timor-Leste 2020-2021 apresenta jogu entre Estrela Baguia Fc kontra Becusse United Fc, ne’ebé termina ho golu 8.
Jogu lao ho intensidade ás kedan, ekipa rua halo kontra – atake agresivu tebes. Nune’e, Bescusse United loke tabela score 0 – 1 liuhosi solo golu ne’ebé Vencesleu Fatima kria iha metade tempu primeira parte nian, iha minute 10.
Becusse United kontinua aproveita didiak kontra – atake sira hotu, hodi lansa ameasas ne’ebé konsege haluan espasu golu ba 0 – 2 liuhosi golu Andre Soares iha minute 15. Ho lakon golu rua ne’ebé Estrela Baguia Fc sofre halo sira kan atu habadak espasu golu, nune’e la konsege antisipa movimentu Andre Soares nian ne’ebé hatama golu ba daruak nian iha minute ikus molok interval, score 0 – 3 mantein to priemira parte termina.
Estrela Baguia loke jogu segunda parte ho erru, nune’e sira lakon domina ba bola sedu de’it. Tan ne’e, maka Vencesleu Martins konsege aproveita frakeza adversariu nian hodi lori Becusse United lidera 0 – 4 iha minute 26.
Ho esforsu ne’ebé sempre falla, nune’e Estrela Baguia Fc muda stratejia hodi bele hamenus ritmu jogu, ne’ebé konsege habadak score liuhosi Evaristo de Araújo iha 28 minutu, Score 1-4. Maske nune’e, liu deit minute ida de’it António Soares responde kedan suta ida ne’ebé Estrela Baguia nia Guarda rede la konsede salva, nune’e, Becusse United lidera score 1 – 5. Ho superioridade Becusse United nian halo Febriano dos Santos mos hatama nia naran iha tabela score liuhosi golu ne’ebé akontese iha minute 34.
Tan ho espasu golu ne’eb’e dok los maka Becusse United halo mudansa ba jogu, nune’e konsege fo opurtunidade ba Estrela Baguia Fc hatama tan golu ida hodi habadak score 2 – 6 liuhosi Lourenco Ximenes iha minute 38. to jogu termina la akontese tan ruma, nune’e Becusse United lidera jogu ho score 2 – 6.
Ho resultadu ida ne’e, lori Becusse United Fc okupa pozisaun 4 ho pontu 43, enkuantu Estrela Baguia Fc iha pozisaun 18 ho pontu 19.
Reportajen: Lidia
