Dili – ( 10/11/2021 ) Mushila Fc kontinua mantein resultadu pozitivu iha jornada 21 Pra-Liga Futsal Timor – Leste kontra Boa Sorte Fc, ne’ebé hala’o iha kampo Futsal F-FDTL fatuhada.
Mushila Fc domina lalaok jogu. Ho nune’e, sira kaer inisiativa ho kria atake ba area defeza Boa Sorte nian, ne’ebé ikus mai konsege muda score liuhosi servisu hamutuk entre Joao de Sousa ne’ebé konsege tama ba area defeza Boa Sorte Fc nian hodi pasa ba Eufrasio Viera ne’ebé bele komverte sai golu, score 0 – 1.
Ida ne’e, halo intensidade jogu makas liu tan, apresenta kontra – atake oin-oin. Maske nune’e score laiha mudansa to primeira parte termina.
Iha segunda parte, Mushila Fc nafatin kaer inisiativa ba jogu ne’ebé konsege aumenta tan golu liuhosi joão de Sousa ne’ebé simu bola husi Natalisio San hodi lansa suta makas ida ne’ebé Boa Sorte nia guarde rede la konsege salva iha minute 35, score 0 – 2.
Liu deit minute rua, iha minute 37 Joao de Sousa konsege inisia atake ida ne’ebé Rui Martins komverte sai golu, score 0 – 3, ida ne’e mak golu ikus iha jogu refere.
Ho Vitoria ida ne’e, Mushila Fc hametin nia an iha pozisaun segundu iha tabele klasfikasaun provizoriu Pra-Liga Futsal Timor Leste ho pontu 52 hodi habadak pontu 3 ho Ramelau Fc iha pozisaun primeiru. Maibé Ramelau Fc sei halao jogu jornada 21 iha sabadu 13/11/2021 kontra Santa Cruz Fc. No haluan espasu pontu 4 ho Mauputar Fc ne’ebé sei jogu ba jornada 21 nian iha loron aban 11/11/2021 kontra Boa Vista Fc. Enkuantu.
Reportajen: JHD media
