Díli – (11/11/2021), akontese jogu jornada 21 Pra liga Futsal Timor – Leste ne’ebé apresenta enkontru entre Boavista Fc kontra Mauputar Fc. iha ne’ebé away termina enkontru ho festa golu.
Ekipa rua hahú jogu ho kuidadu, maske nune’e, Mauputar Fc mak domina jogu hodi kaer inisiativa ba atake. Nune’e, iha minute 16 mak Davidson Lopes foin bele loke golu liuhosi suta ne’ebé guarda rede Boavista Fc la konsege salva, score 0 – 1.
Golu refere halo Boavista fc nia jogadór fasil lakon bola. Ho kondisaun ida ne’e maka Mauputar Fc konsege hadau bola hodi lansa atake ida ne’ebé Mario Moniz komverte sai golu iha minute 18, hodi haluan liután espasu golu, score 0 – 2.
Lalaok jogu segunda parte kontinua la’o ho Mauputar Fc nia dominasaun hodi kria intensidade atake as liután. Ida ne’e, harahun konsentrasaun jogadór Boavista Fc nian ne’ebé ikus mai Raimundo Sarmentu antisipa sala Miguel Lay nia suta hodi bola halai tama fali ba sira-nia guarda rede (on goal) iha minute 26, score 0 – 3. Liu de’it minute 1 Ruben Faria konsege hatama tan goal hodi muda score ba 0 – 4.
Tama ba minute 30, Mauputar Fc nia jogadór Miguel lay ne’ebé kria ameasa oin-oin desde ohin, konsege hatama nia naran iha tabela score hodi muda score 0 – 5. Ikus mai, Davidson Lopez konsege aproveita atake hodi marka golu ikus iha enkontru refere, score 0-6
Pra – Liga Futsal Timor – Leste hanesan pra kompetisaun hodi selesiona klubu ne’ebé sei joga iha primeira no segunda divizaun iha tinan oin. Iha ne’ebé, husi klubu 28 ne’ebé partisipa iha Pra – Liga futsal Timor Leste sei fahe ba divizaun rua ; pozisaun 1 to’o 10 sei ba primeira divizaun no 14 seluk sei jogu iha segunda divizaun.
Ho nune’e, Vitória ida ne’ebé Mauputar Fc atinji hametin sira – nia pozisaun iha 3 tabela klasifikasaun Provizoriu Pra – Liga Futsal Timor – Leste 2020 – 2021 ho pontu 51, menus pontu ida husi Mushila Fc iha pozisaun 2, halo sira sei tam aba primeira divizaun. Enkuantu, Boavista Fc tun ba pozisaun 14 ho pontu 28, iha ne’ebé todán tebes atu hakat ba primeira divizaun iha tinan oin. Tan sira iha espasu pontu 4 ho Gamer Fc ne’ebé sei jogu jornada 21 iha sexta 12 novembru 2021.
Reportajen : Media JHD
