Díli – 12/11/2021, ohin ita hanoin hikas Masakre Santa Cruz ne’ebé akontese iha tinan 30 ba kotuk nu’udár parte husi Luta juventude sira – nian ba ita – nia ukun án. Ema ida – idak iha meius rasik hodi realiza homenajén ida ne’e, tan ne’e, juventude Futebolista no amante sira hotu sei realiza kampeonatu ne’ebé ás liu iha mundu Futebol Timor – Leste, koñesidu ho naran Liga Timorense ba da – 5 epoka 2021. Ne’ebé sei hahu iha 12/11/2021 no sei remata iha 23/12/2021, no sei abertura husi Aitana Fc vs Karketu Dili Fc iha Estadium Municipal Dili, horas 16.00 Otl.
Liga Timorense uluk liu ho naran liga Futebol Amadora (LFA) ne’ebé realiza ba dahuluk nian iha tinan 2016. No to’o agora halao ona ba dala – lima, 2016, 2017, 2018, 2019 no 2021. Enkuantu tan Pandemia covid – 19 ne’ebé invade ita – nia rai maka 2020 lakonsege realiza. Iha ne’ebé, eziste klubu 4 mak sente ona atmosfer nu’udár kampeaun ba Liga Timorense; SLB ho pontu 21, Karketu Díli ho pontu 28, Boavista Fc ho Pontu 32 no Lalenok Fc ho pontu 30. Enkuantu ba epoka ida ne’e.
Enjerál, Liga Timorense sei partisipa husi ekipa 8, 6 mak klubu sira ne’ebé augenta iha primeira divizaun no 2 seluk mai husi segunda divizaun husi epoka hanesan. Espeialmente iha epoka ida ne’e ekipa 6 ne’e maka ; Karketu Díli, AD SLB, Lalenok United Fc, Assalam, AS Ponta Leste no Boavista Fc no klubu ne’ebé hetan promosaun husi segunda divizaun maka ; Aitana Fc ho DIT Fc. Maibé tan rajaun Finanseiru maka Boavista Fc retira husi eventu, nune’e klubu 7 de’it mak sei partisipa.
Normalmente, primeira divizaun nia sistema joga sei la’o home no away, katak kada klubu sei hasoru kada adversáriu dala – rua. Maibé iha epoka ida ne’e sei iha mudansa ba sistema tanbá kestaun tempu ne’ebé badak dau-daun. Nune’e, kada klubu sei hasoru kada adversariu dala-ida de’it, hodi bele termina kedan iha tinan 2021.
Reportajen JHD media
