Dili-12/11/2021, Karketu Dili Fc tenki gasta enerjia lubuk hodi bele menan Aitana Fc iha semana dahuluk Primeira Divizaun Liga Timorense epoka 2021, ho score 0 -1.
Klubu rua hahu jogu ho intensidade ás kedan. Ida – idak tenta produs golu hodi bele hakaman sira-nia pozisaun. Husi minute 10 – 30 Karketu Díli mak domina bola husi ain ba ain, hodi tenta kria atake ba area defeza Aitana Fc nian, maibé la fo ameasa perigoju ruma tan jogadór Aitana Fc nia disiplina ne’ebé organiza no reorganiza formasaun defeza ida forte. Ho nune’e, Aitana Fc mak iha opurtunidade uluk hodi lansa ameasa liuhosi Gilson do Reis ba guarde rede karketu Díli nian.
Lalaok jogu kontinua la’o ho kontra – atake husi klubu rua. Liutiha minute balun husi Aitana Fc nia ameasas maka Karketu Díli foin lansa ameasa dahuluk ba Aitana Fc nia guarde rede, liuhusi Jose Guterres da Silva nia suta ne’ebé hó fasilmente Yusak S. Redjauw salva.
Ho aprensentasaun kontra – atake no disiplinasaun husi jogador klubu rua hamoris liután atmosfer iha Estadio Munisipál Díli. Nune’e, to primeira parte termina klubu rua la konsege kria golu ruma, score nafatin 0 – 0.
Iha Jogu Segundu parte, jogadór husi klubu rua nafatin disiplina hodi la fo fatin ba ekipa ida hodi inisia atake periguju. Maske nune’e, Karketu Díli Fc mak domina jogu hodi tenta kria atake ba area defeza Aitana Fc nian. Nune’e, Ikus mai, ho esforsu sira hotu karketu Fc konsege lansa ameasa periguju liuhosi Gaudencio Monteiru kria suta ne’ebé jogadór Aitana Fc konsege blokeia. Nomos liuhosi Gelvanio Alberto nia suta makas ne’ebé guarda rede Aitana Fc konsege tuku sai.
Hafoin tama ba minute 79 maka Karketu Díli Fc konsege loke tabela score liuhosi asaun Gaudencio Monteiru ne’ebé lori bola tama ba area defeza Aitana Fc, nune’e konsege finaliza ho suta ne’ebé guarda rede la konsege salva. Score 0 – 1.
Depois de golu, iha minute tuir mai mak Aitana Fc foti inisiativa hodi halo presaun ba area defeza Karketu Díli Fc, atu bele halo empata. Maibé to termina jogu la akontese golu ruma, nune’e Karketu Díli Fca konsege manan ho score 0 – 1.
Tuir Asistente husi Treinador Klubu Aitana FC Galucho M.G.P De Carvalho katak, “ba oin ami sei hadia linha ne’ebe failla, liu-liu iha linha Defeza nian“.
Enkuantu, iha sorin seluk Treinador Klubu Karketu Dili FC, Vicente Ramos hateten, “Karketu preparadu ba save tres pontus nian no konsege realiza duni objetivu nee. Ami presija hadia iha avansadu no jogu tuir mai ami sei hatun avansadu nain-2 husi estranjeiru”.
Aitana Fc : Octavianos Soares; Yohanes S. Redjaue, Yosef Koyami, Gabriel da Costa, Roberto J. Maia, Lamberto Ximenes, Gilson dos Reis, Gilbelber Lay, Edit Savio, Fransyatma Kefi, Jose Pereira, Rivaldo Correia.
Karketu Dili Fc : Vicente Ramos; Franky da S. C., Norberto Goncalves, Antonio Profirio, Domingos Ramos, Angiso Barbosa, Gaudencio Monteiro, Silvestre Gama, Nataniel Reis, Gelvanio Barreto, Jose Guterres da Silva, Valarino Boaventura
Reportajen : Putri
