DILI–Ekipa Futsal femenina Ministeriu Asuntu Kombatentes Libertasaun Nasional (MACLN) susesu koleta pontus masimu hafoin festa golu ba nia adversariu Ministeru Interior (MI) iha jogu abertura “Taxa 3 de Marsu”.
Duelo entre ekipa MACLN kontra Ministeru Interior ne’e hala’o iha kampu multifunsaun Bebora Dili Kinta (15/02/2024).
Iha inisiu jogu ekipa rua hala’o jogu tensi ne’ebe mak aas hodi lansa kontra atake ba malu maibe ekipa uma nain MACLN ne’ebe mak haforsa hosi jogador sira ne’ebe mak iha esperensia diak iha futsal konsege domina liu bola hodi lansa suta fila fila no konsege produs golu lima iha priemeira parte.
Enkuantu ekipa Ministeru Interior laos la iha oportunidade maibe atake ne’ebe mak lansa hosi ekipa Ministeru Interior ekipa guarda defensivu hosi Ministeru Asuntu kombatentes Libertasaun Nasional (MACLAN) matein solidu hodi la fo fatin ba ekipa Ministeru Interior atu produs golu ho nune’e to’o termina jogu priemeira parte ekipa Ministeru Interior lidera ho score 5-0.
Kontinua ba jogu segunda parte tensi jogu komesa makas liu tan ba ekipa rua ne’e hodi lansa kontra atake ba malu no ekipa Ministeru Interior ne’ebe mak sofre ona golu lima iha priemeira parte tenta halo mudansa oioin hodi lansa kontra atake hasoru ekipa MACLN maibe esforsu ne’ebe mak ekipa Ministeru Interior halo seidauk bele rezulta golu tanba linha defensivu hosi ekipa MACLN mantein linha metin hodi la fo fatin ba ekipa Ministeru Interior.
No iha segunda parte ne’e ekipa MACLN aproveita hodi halo kaunter atake no konsege produs tan golu haat iha segunda parte hodi hatuur score ba 9-0 to’o termina jogu segunda parte.
Hosi rezultadu vitoria ne’e hatuur ekipa uma nain MACLN iha pozisaun dahuluk ho pontus 3 hosi jogu dala 1. Enkuantu ho derota ne’ebe mak ekipa Ministeru Interior sofre hatuur provizoriu ekipa Ministeru Interior iha pozisaun ikus liu ho pontus 0.
Entertantu taxa 3 de marsu ne’e ho objetivu atu komemora loron veteranus nian atu valoriza istoria pasadu ne’ebe mak luta nain sira husik hela no transfere valores ne’e ba jerasaun foun sira liu-liu instituisaun sira.
JHD