DILI-Ultimu Kongresu Federasaun Futebol Timor-Leste (FFTL), ladauk serteza tanba Asosiasaun futebol Munispiu Ainaro no Viqueque ladauk rezolve problema internal.
Relasiona ho asosiasaun 3 ne’ebe mak sa’i polemika iha kongresu extraoridinariu FFTL ba da-9 iha Ótel Timor loron 10-01-2024, foin mak asosiasaun arbitrajen mak halo kongresu maibe asosiasaun rua sei nafatin iha polemika nia laran mak asosiasaun futebol Munispiu Ainaro no Viqueque.
Prezidente Interinu FFTL Domingos Raul Falur Rate Laek deklara, tanba polemika ne’ebe mak akontese iha asosiasaun 3 nia laran mak halo altersaun ba kongresu FFTL hodi fo kondisaun ba asosiasaun sira atu rezolve problema internal.
“Ate agora asosiasaun arbitrajen nian mak prontu agora Ainaro nian ha’u haruka karta ofisial ida ba sira maibe la halo to’o agora, Viqueque enatun la mehi liu entaun ita agora labele halo lai kongresu FFTL”, dehan prezidente interinu FFTL Domingos Raul Falur Rate Laek ba jornalista sira iha Taibese Dili, Domingu (18/02).
Nia deklara, atu realiza Kongresu FFTL ne’e depende ba fali asosiasaun sira tanba ne’e husu ba asosiasaun sira atu ho ulun malirin hodi rezolve problema internal.
“Depende asosiasaun sira halo tiha hotu sira nia kongresu depois mak ita halo kongresu FFTL” Nia informa
“Ha’u husu sira para bele aselera laos tanba sira ema hotu nia hakarak ba bola nia ne’e atu impede ne’e labele” afirma Prezidente interinu.
Hosi asosiasaun 3 ne’ebe mak sa’i polemika iha kongresu FFTL ne’e asosiasaun arbitrajen futebol Timor Leste mak hala’o ona kongresu no Nivio Fernandes mak eleitu ba prezidente AAF-TL ba periode tinan 4 mai.
Antes ne’e iha loron 25 fulan Janeiro tinan 2024 ne’e Sekretariu jeral Asosiasaun Futebol Munispiu Viqueque (AFV) Rosito Soares Do Rosario, hatete, AFV Garante Sei La Akontese Tan Polemika Iha Ultimu Kongresu FFTL tanba depois polemika ne’ebe akontese iha kongressu iha 10 de janeiru liu ba, iha 16 de Janeiru strutura komvoka ona enkontru no iha ona opsaun no halo ona akta no prepara ona Karta ba desizaun konjunta hodi hein orientasaun husi FFTL.
JHD
