DILI– Relasiona ho kongresu extraoridinariu FFTL ba da-9 ne’ebe mak hala’o iha Ótel Timor Dili Kuarta 10 fulan Janeiro ne’ebe mak kanseladu, Governu liu hosi Ministeriu Juventude Desportu Arte Kultura (sigla portuges MJDAC) deside sei la fo apoiu finanseiru tanba la iha lideransa.
Kongresu extraoridinariu ne’ebe mak observa direta hosi reprezentate AFF AFC no FIFA ne’e tenke kansela tanba komite eleitoral la iha seriedade hodi foti desizaun no ikus mai kandidatu prezidente FFTL Nilton Telmo Gusmao do Santos deside rejigna aan tanba konsidera eleisaun refere la iha kredibilidade.
“Bainhira federasaun ida iha ita nia rai, atu futebol, voleibol ka basketebol no sira seluk tan, sira nia organizasaun lao la diak la iha lideransa mak governu liu husi MJDAC sei la fo apoiu finanseiru ba sira nia atividade” dehan Ministru juventude desportu arte kultura Nelyo Isaac Sarmento ba jornalista sira iha resintu edifisiu MJDAC Lecidere, Dili Kinta (11/01/2024)
“Maibe governu nia servisu liu husi komisaun nasional desportu hare’e lalaok organizaun sira nune’e kongresu FFTL nian kansela ne’e ita nia ema husi komisaun nasional desportu balun mos akompaña hela no sira iha relatoriu ba kongresu nian depois ita sei halo desizaun aktu kongresu FFTL da IX nian ne’e” dehan Nelyo.
Governante ne’e informa, governu la fo apoiu ne’e la signifika governu atu husik liman maibe governu iha komisaun nasional desportu atu hare’e problema iha federasaun sira tanba governu nia servisu ba fatin hotu no organizasaun nia interese hotu-hotu.
Nia informa tan, governu mos sei haruka karta ba FFTL atu nune’e FFTL halo esplikasaun ho relatoriu kongresu FFTL oinsa depois submete mai governu atu foti desizaun problema akontese iha FFTL liu husi kongresu FFTL da IX kansela ne’e.
JHD
