DILI- Orgaun Liga Futebol Timor-Leste (LFTL) sei oferese premiu 45.000 USD ba klube ne’ebe mak sai kampiaun iha Super Tasa epoka 2022 ne’ebe sei partisipa husi klube haat (4) mai husi kampiaun no pozisaun daruak divizaun dahuluk, Kampiun divizaun daruak no Kampiaun tasa 12 Novembru.
Tuir Diretor relasaun públika LFTL Diego Neto Fraga, tinan ne’e orgaun liga sei oferese premiu ba kampiaun super tasa diferente ho tinan liu ba kotuk ne’ebe klube ida ne’ebe mak manan iha super tasa sei simu premiu 45,000 USD.
“Tinan ne’e klube ne’ebe kampiaun super tasa sei simu premiu 45.000 USD no klube ne’ebe runner up sei simu premiuu ho valor 5.000 USD ne’ebe ami sei fo oportunidade ba klube haat ne’ebe mai husi kampiaun no runner up divizaun dahuluk ho kampiaun divizaun daruak Liga Timorense no Kampiaun tasa 12 Novembru ne’ebe super tasa nia orariu ami sei prepara orariu ketak ba kompetisaun ne’e to’o hetan manan nain iha jogu final“, direitor relasaun publika Diogo N. Fraga ba jornalista sira liu husi pres konferensia iha nia knaar fatin Bairro Formosa, Díli tersa (12/04).
Nia hatutan, klube ne’ebe sei sai kampiaun divizaun dahuluk Liga Timorense epoka 2022 sei hetan 2,000 USD, Kampiun iha divizaun daruak sei simu premiu 10,000 no klube ne’ebe manan iha tasa 12 novembru sei simu 15,000 USD.
Nia dehan, Mellor markador iha divizaun dahuluk no daruak Liga Timorense epoka 2022 sei simu premiu 1,000 USD.
Diogo informa, tinan ne’e premiu jogu ba klube sira iha divizaun dahuluk sei simu premiu 2,000 USD ne’ebe manan sei hetan 70% ho orsamentu montante 1,400 USD, impata sei fahe 50% ho orsamentu montante 1,000 USD no lakon hetan 30% ho montante 600 USD no premiu jogu ba divizaun daruak epoka 2022 sei simu 1,000 USD ne’ebe manan sei simu 70% ho orsamentu montante 700 USD, impata sei simu 50% ho montante 500 USD no lakon sei simu 30% ho montante 300 USD.
Orgaun liga iha tinan ne’e sei realiza divizaun dahuluk Liga Timorense ne’ebe sei partisipa husi klube 10 no Segunda divizaun sei partisipa klube hamutuk sia no tasa 12 novembru sei partisipa husi klube 19.
ADS
