DILI– Reuniaun entre Orgaun Liga Futeból Timor-Leste (LFTL), ho Federasaun Futeból Timor Leste (FFTL), iha ona konkordansia hodi nafatin organiza Liga Timorense epoka 2022-2023, maibé orsamentu ba atividade Liga Timorense la sufisiente tanba ne’e aban sei haruka karta ida ba Sekretariu Estadu Joventude no Desportu (SEJD).
“Osan ne’ebé agora ami iha seidauk naton para atu bele organiza Liga, entaun Desizaun ikus mak ne’e ami prezidenti LFTL ohin mai reuniaun iha ne’e ho Diretor sira Sekretariu jerál ho vise prezidente na’in rua hosi LFTL no reprezentante klubu na’in rua foti desizaun katak aban haruka karta ida ba Sekretariu Estadu Joventude no Desportu hanesan Governo hanoin fila fali halo nusa mak haree posibilidade para bele oinsá fó apoiu tan atu núne’e ami bele liu hosi Federasaun no mós LFTL bele organiza Liga” informa Prezidenti FFTL Francisco Jerónimo ba Jornalista sira iha edifisiu FFTL, segunda, (12/09).
Tuir nia, Liga seidauk hahú tanba sira sei iha problema kona ba orsamentu ida ne’e mak sira deside atu haruka karta ida ba SEJD
“Liga seidauk hahú tanba ami sei iha problema kona ba orsamentu ida ne’e mak ami nia desizaun ba lai ko’alia tiha ho Sekretariu Estadu Joventude no Desportu pois mak desizaun saida mak ami halo ami sei informa fila fali ba públiku i ami mós hakarak Liga ne’e tenke la’o labele para” nia Salienta.
“Komitmentu ami nia ami hakarak nafatin tinan ne’e tenke realiza, ami lakoi husik hela ba tinan oin, tanba epoka ida ne’e tuir kalendariu FIFA nian ne’e tinan ne’e la’o to’o tinan oin hahú hosi 2022-2023” nia akresenta.
“Ami konkorda malu wainhira to’o ba iha governu haree oituan posibilidade saida mak bele halo governu ninia hanoin oinsá pois ikus mai ami sei tuur hamutuk fila fali para deside hamutuk ho klubu sira para atu bele hahú ona Liga“
Iha fatin hanesan Prezidente Liga Futeból Timor-Leste (LFTL), Nilton Gusmao, afirma, sira iha kompromisiu atu tempu badak bele realiza Liga Timorense maibé sei falta orsamentu.
“Hanesan ohin prezidenti dehan ona, ami iha kompromisiu hanesan atu tempu badak Futeból ne’e tenke la’o, ita sei iha hela situasaun ida falta orsamentu tanba ne’e mak ideas hosi prezidenti Federsaun rasik hanoin atu halo audensia ida ho Sekretariu Estadu Joventude no Desportu rasik ” nia informa.
“Kompromisiu ami nia mak ne’e kick off tenke tinan ida ne’e mais Liga epoka 2022 -2023, maibé depende ba reuniaun ida ikus ne’e ” tenik nia
Entretantu orsamentu ne’ebé mak dadaun ne’e iha mai hosi SEJD hamutuk 200 mill no FFTL 200 Mill ho núne’e totál hamautuk 400 mill.
Tuir informasaun klubu Primeira Divizaun husu subsidiu 40 Mill no hosi segunda divizaun husu subsidiu 20 mill
CharllY Junior
