DILI– Tinan ne’e modalidade karate-do Timor Leste susesu hatudu rezultadu pozitivu iha jogu Sea games ba edisaun 32 iha Kambodia hodi lori fila Medalla osan metan rua, maibe governu liu hosi Ministeru Edukasaun Joventude no Despotu (MEJD) ho Sekretariu Estadu Joventude no Despotu (SEJD) abandona tiha no la simu iha airaportu Nikolau Lobato.
Prezidente Karate-do Timor Leste, Filomeno Soares de Araujo hatete, Medalla ne’ebe mak karate-do oferese iha jogu Sea Games tinan ne’e nuudar medalla dahuluk ne’ebe mak karate-do oferese ba Timor Leste tanba ne’e nia parte sente kontente tebes, maibe nia mos triste tanba governu la simu atelta sira iha airaportu.
“Ha’u sente triste tanba atleta sira ba tuir kompetisaun laos lori sira nia privadu maibe lori nasaun Timor Leste nia naran, maibe to’o hikas fali mai Timor Leste governu la simu atleta sira iha Aeroportu”dehan Filomeno ba jornalista sira iha Aeroportu Internasional Nicolao Lobato Comoro, Dili, kuarta (10/05/2023).
“Tuir lolos Sekretariu Estadu Juventude Desportu mai partisipa iha nee hodi nunee simu ita nia delegasaun ne’ebe hatudu prestarasaun diak iha Sea Games Cambodia” nia konklui.
“Ami Federasaun sente triste boot ho hahalok sira hanesan nee” nia lamenta.
Prezidente FEKATIL ne’e mos husu ba governu liu husi Sekretariu Estadu Juventude Desportu atu halo tratamentu hanesan ba Federasaun hotu no labele diskrimina federasaun ida.
Iha sorin seluk Treinador Nasional Modalidade Karate-do, Andreas Quefi mos esperesa sentimentu treiste ba governu.
“Ami triste tebes tanba ami ba hatudu prestarasaun maibe fila governu la simu ami“dehan nia.
Nune’e mos Atleta Kara-tedo Timor Leste, Dionísio Quefi sente triste tanba governu la simu sira ho dignu
“Mai hau sente triste tanba momentu ami dezloka ba governu koalia lia fuan balu ba ami, i liafuan sira nee ami halo tuir duni, maibe ami fila fali ami sira la simu“dehan nia.
Tuir ajenda iha loron hanesan SEJD mos konvida ona atelta nain rua husi federasaun Karate-do ne’ebe hetan Medalla Bronze sei hasoru Sekretariu Estadu ba Juventude no Desportu iha Salaun SEJD. Maibe tuir Informasaun Federasaun karate-do seidauk bele hasoru SEJD ho razaun tanba sei hein modalidade sira seluk fila hosi Kambodia.
Entertantu antes ne’e iha jogu Sea Games ba edisaun 31 iha Vietnam atleta sira lori fila Medalla mai Timor Leste simu direita hosi Vise Ministeru Edukasaun Joventude no Despotu Antonio Guterres maibe tinan ne’e governu Ignora atleta sira ne’ebe hamorin ona Timor Leste nia naran iha eventu internasional.
Fo hanoin nafatin mos katak Sea Games ba edisaun 32 Kambodia ne’e uniku modalidade karate-do mak foin konkista medaila osan metan rua Mai Timor Leste.
Medalla rua ne’e oferese hosi Atelta Dionísio Quefi no Jacob Manuel hafoin sa’i terseiru lugar.
JHD
