Jogu hahu ho ritmu Kalma iha minutu dahuluk. Klube rua tenta atu domina bola hodi halo tentativa ba area adversariu nian. Tama ba minutu 3, S’Amuser Fc konsege hadau bola hodi lori tama ba area Buibere Fc nian, ne’ebe finaliza ho suta ne’ebe guarda rede konsege tuku sai hodi kona fali jogador Buibere nia liman, hodi resulta penalti. Dolores Silva Costa ne’ebe ezekuta penalti konsege aproveita ho Diak, score 1 – 0.
Tuir mai, lalaok jogu komesa manas akontese kontra – atake, no ritmu jogu Ida agresivu hodi resulta falta barak, liuhosi asaun jogador Buibere Fc. Nune’e, to primeira parte termina S’Amuser Fc kontinua lidera ho score 1 – 0.
Tan lakon golu ida, Buibere Fc hahu segunda parte ho agresivu liutan, hodi domina jogu no tenta kria atake ba area S’Amuser Fc nian. Tama ba minutu 60 resin maka Buibere Fc hetan opurtunidade hodi fo ameasa ne’ebe guarda rede konsege antisipa ho diak.
Iha minutu 10 ikus, Buibere Fc lansa tan atake ida ne’ebe konsege hetan opurtunidade diak los atu marka golu liuhosi asaun Sonia Gomes Amaral ho numeru kamizola 29 konsege ultrapasa tiha ona guarda rede hodi suta bola as liu tian.
Nune’e, to enkontru termina, Buibere Fc la konsege aproveita sira – nia dominasaun no opurtunidade hotu hodi halo empata, no score 1 – 0 augenta to remata.
Ho Vitoria ida ne’e lori S’Amuser Fc ba tur iha pozisaun dahuluk iha tabela klasifikasaun provizoriu primeira divizaun Liga Timorense de Futebol Femenina ho pontu 11. Enkuantu, Buibere Fc tun ba pozisaun segunda ho pontus 8.
Reportajen: Putri & Lidia
