Dili – jogu kontinuasaun Liga Futebool Timor-Leste (LFTL) Primeira divizaun jornada da-neen entre As Ponta Leste kontra Assalam Fc termina ho score 1-1.
Jogu ne’ebé mak hala’o iha Estadion Munisipal Dili kinta (16/12), ne’e iha inisiu jogu ekipa rua ne’e hotu hotu tun ho ambisaun aas hodi lansa kontra ataka ba malu Assalam Fc ne’ebe mak ohin hatun nia jogador selesaun Nasionál hamutuk na’in.
Enkuantu As Ponta Leste mós hatun nia jogador selesaun Nasionál hamutuk na’in 3 hodi reforsa sira nia ekipa maibé iha inisiu jogu ne’e As Ponta Leste domina liu bola hodi lansa no kontra ataka makas ba adversariu Assalam Fc.
No tama ba iha minutu 13 As Ponta Leste lidera kedas ho score 1-0 hafoin Momin Mohammed susesu fura rede Assalam Fc ne’ebé mak hein husi Junildo Pereira.
Momin marka golu hafoin simu assistensia suta livre husi Revelino Martins husi parte iskerda no Momin aproveita hodi halo golu ho bola ulun.
As Ponta Leste kontinua domina bola no mantein lansa ataka ba Assalam Fc liu husi bola ain ba ain maibé oportunidade sira ne’e la aproveita ho di’ak.
Assalam Fc foin mak hetan nia ritmu joga no konsege sai husi presaun As Ponta Leste ho nune’e tama ba iha minutu 37 responde hikas hodi halo empata score ba 1-1, liu husi jogador Agusto da Costa hodi score refere mantein to’o termina jogu primeira parte.
Kontinua ba jogu segundu parte, ekipa rua hotu hotu iha amibasaun hodi marka golu maibé ekipa As Ponta Leste ne’ebé mak domina bola konsege suta ameasa fila fila ba rede Assalam Fc maibé la rezulta golu.
Iha minutu ikus Assalam Fc tenta atu produs golu liu husi kontra atake husi ain ba ain maibé esforsu ne’e la konsege hetan rezultadu pozetivu ho nune’e to’o termina jogu segunda parte score mantein 1-1.
Ho rezultadu empata ne’e hatuur ekipa As Ponta Leste okupa iha Segundu klasifikasaun provizoriu Liga Futebool Timor-Leste (LFTL) ho pontus ualu (8) husi joga dala (5) manán dala rua (2) empata dala rua (2) no lakon (1).
Enkuantu Assalam Fc mantein okupa iha 5 klasifikasaun provizoriu Liga Futebool Timor-Leste (LFTL) ho pontus 5 husi joga dala liama (5) manán dala ida (1) empata dala rua (2) no derota dala rua (2).
As Ponta Leste: Albino Ximenes, Nelson António, Candido de Oliveira, José de Oliveira, Americo Martins, Expedito da Conceicao, Marito dos Santos, Mumin Mohammed, Revelino Martins, Domingos de Araújo, Samuel da Cruz.
Assalam Fc: Junildo Pereira, Joao Soares, Jaimito Soares, Sandro Quintao, Riki Permana, Jovanio Braz, Andrew Budiono, Therl Theny, Agusto da Costa, Bonarudin Amin, Hasan Ramos.
Rep.: CharllY
