Dili – Karketu Dili Fc susesu sai Kampeaun ba Liga Futebool Timor-Leste (LFTL) Primeira Divizaun hafoin manán As Ponta Leste ho score 1 – 0 iha jornada da-6 epoka 2021.
Duelo entre Armada Matak Malirin kontra As Ponta Leste ne’e hala’o iha Estadion Munisipal Dili tersa (21/12).
Armada Matak Malirin ne’ebé hala’o jogu ho agresivu desde inisiu susesu obriga As Ponta Leste nia linha defensivu husi halo auto golu iha minutu 1 ho nune’e Karketu Dili Fc lídera ho score 1-0.
Auto golu ne’e akontese hafoin Eugene halo krosin iha iskerda no defaza husi As Ponta Leste konsege kabesa sai no monu ba As Ponta Leste no bola monu ba Natanael Reis no Natanael hala’o nia nia asaun hodi suta no ikus mai bola kona Americo Martins no tama ba rede laran.
No tama ba iha minutu 7 Ponta Leste konsege suta ameasa dala ida ba rede Karketu Dili Fc liu husi jogador Silveiro Garcia maibé seidauk kona tarjetu.
Tama ba iha Minutu 15 As Ponta Leste halo tan ameasa dala ida suta liu husi jogador Anizo Correia maibé seidauk kona iha tarjetu.
Tama ba iha minutu 20 Gaudensio Monteiro tenta atu marka tan golu hodi aumenta score ba Karketu Dili Fc maibé bola kruza husi Olegario Boavida nian ne’e la aproveita ho di’ak ho nune’e la rezulta golu.
tama ba iha minutu 22 As Ponta Leste suta ameasa dala ida ba rede Karketu Dili Fc liu husi jogador Armindo de Almeida ho suta livre maibé sei bele antisipa ho di’ak husi guarda rede Karketu Dili Fc nune’e la rezulta golu.
As Ponta Leste halo tan ameasa dala ida ba rede Karketu Dili Fc iha minutu 40 Garsia remata tan dala ida maibé seidauk kona tarjetu nune’e la rezulta golu.
Maske ekipa rua ne’e halo nafatin kontra ataka ba malu maibé la iha golu ruma akontese to’o termina jogu primeira parte score mantein 1-0.
Kontinua ba jogu segunda parte ekipa rua tun jogu ho agresivu hodi lansa no kontra ataka ba malu liu husi kontra ataka no halo subtituisaun ba jogador sira hodi halo mudansa ba tatika maibé la konsege aumenta golu.
Iha minutu ikus As Ponta Leste iha oportunidade hodi halo empata ba jogu maibé oportunidade ne’e la rezulta golu no bola kona de’it ba besi rin ho núne’e score mantein 1-0. Vitória ba Karketu Dili Fc.
Husi rezultadu vitória ne’e lori Armada Matak Malirin sai Kampeaun ba LFTL epoka 2021 Primeira Divizaun ho pontus 14 husi joga dala neen (6) manán dala haat (4) no empata rua (2). Liu pontus haat ba Lalenok United FC ne’ebé mak tuur iha segundu klasifikasaun ho pontus 10 no Lalenok United Fc hela joga ida maibé Lalenok United Fc la bele sai Kampeaun ona tanba liu ona pontus 4
Enkuantu Karketu Dili Fc konsege sai lampeaun ba da-ruak, antes ne’e armada Matak Malirin sai Kampeaun iha tinan 2017 no foin mak Kampeaun fila fali iha 2021
Rep.: CharllY
