DILI – Governu liu husi Sekretaria Estadu Joventude no Desportu (SEJD) hamutuk ho Federsaun Futebool Timor-Leste (FFTL) sei harii Sentru Juvenil iha Timor laran tomak iha tinan oin.
Lia hirak ne’e hato’o husi Sekretáriu Estadu Joventude no Desportu (SEJD) Abrao Saldanha liu husi nia diskursu iha enseramentu Liga Futebool Timor-Leste (LFTL) epoka 2021 iha Estadion Munisipal Dili kinta (23/12).
Membru governu ne’e explika Tinan ida ne’e sira hahú introduz ona Festival ba Juvenil no Liga ba Juvenil.
“Tinan oin mai ita atu harii sentru Juvenil iha Timor laran tomak hamutuk ho Federsaun Futebool nune’e ita bele perpara nafatin futebolista ba ita nia rain” Dehan Abrao
Abrao haktuir, “Kompromisiu saida mak governu halo hamutuk ho Federsaun hanoin atu hahú Futebool husi baze”.
Abrao akresenta, Governu mós iha orsamentu aprovadu ona ba tinan oin hanoin atu harii tan Estadion Munisipal tolu atu avansa ba nia estudu ne’ebé jere ba tinan oin.
“Se buat hotu la’o di’ak tinan tuir mai ita bele hahú investe ba Estadion sira no husi ne’e ita bele iha esperansa ida katak pelumenus tinan lima mai ita la lori fali 0 hanesan agora” tenik nia.
Rep.: CharllY
