Dili – Atleta Yohan Goutt Gonsalves husi Federsaun Sky Timor Leste (FSTL) sei reprezenta Timor-Leste hodi ba partisipa iha jogu Winter Olimpiku iha sidade Beijin China iha fulan Fevereiru tinan ne’e
Asuntu ne’e hato’o husi Sekretáriu Estadu Joventude no Desportu (SEJD), Abrao Saldanha ba jornalista sira, hafoin halo reuniaun ho embaixador China mai Timor Leste iha nia knaar fatin kuarta, (05/01/2022).
“hau informa ba embaixador sira katak ita iha atleta ida husi Sky ne’ebé mak prepara iha Fransa, no nia konsege liu apuramentu ba jogus olimpiku ida ne’e no nia sei reprezenta Timor-Leste iha jogu Olimpiade ne’e” tenik Abrao
Membru Governu ne’e hatete, delegasaun ida ba partisipa iha ne’ebá no Timor Leste, preparadu ona ho delegasaun ida, prepara ona atleta ida ne’e maka Yohan Goutt Gonsalves, ne’ebé sei ba partisipa iha winter olimpiku iha China tinan ne’e.
Abrao akresenta, perparasaun ne’e sei halo husi atleta ho nia Treinador sira iha nia fatin, partisipasaun ne’e mak sei apoiu husi governu Timor Leste ne’ebé mak sei reprezenta Timor-Leste hodi partisipa iha jogu ne’e.
“Agora dadaun sei iha diskusaun ho komité olimpiku atu haree ba nesesidade hira mak governu bele apoiu no China mós iha disponivel atu asisti nesesidade ruma ne’ebé presiza“.
Iha fatin hanesan Embaixador China mai Timor Leste, Xiao Jianguo hatete, “objetivu ohin mai hasoru SEJD ne’e atu ko’alia kona-ba Timor-Leste nia preparasaun atu partisipa iha Olimpic Winter Games ne’ebé mak iha tempu badak nia laran iha Beijin”
Sente kontente tebes tanba Timor Leste mós iha ona perparasaun no nia fiar katak Timor Leste sei haruka nia atleta ida ne’ebé mak diak liu iha jogu ne’e tanba husi ne’eba bele hatudu Timor nia pontensial liu liu iha Modalidade ida ne’ebé mak Timor Leste rasik iha
Rep : CharllY
