Dili – Vice kordenador movimentu Amantes Futebool Timor-Leste, Inocencio de Jesus Xavier, informa, Francisco Kalbuadi Lay la merese atu kandidatu aan ba Prezidente Federsaun Futebool Timor-Leste (FFTL) ba periodu 2022-2026.
”Ha’u hanoin kandidatu Francisco Kalbuadi Lay ne’e la merese ona atu kandidatu aan ha’u enkoraja di’ak liu deskansa tanba nia la iha progresu di’ak ba Futebool tanba ne’e di’ak liu haree de’it ba nia kargu polítiku” informa Vice kordenador movimentu Amantes Futebool ba jornalista sira iha nia knaar fatin farol Dili kuarta, (12/01).
“Ba ha’u hakfodak ho figura antigu sira ne’ebé mak durante nia mandatu la halo buat ida ba dezenvolvimentu setor desportu futebool, liu liu ba Francisco Kalbuadi Lay” tenik nia.
Tuir nia Timor Leste presiza duni ema ho vizaun foun ho otas nurak tanba tempu ona para fó ba joven sira no tenke ba ema foun para bele lori atmosfera foun ba iha setor desportu liu liu ba Futebool ne’e ba Timor oan hotu.
Nia explika, “Kalbuadi Lay nia kazu ba falsifikasaun dokumentus ami rasik mak lori nia bá prosesu siknifika nia seidauk livre husi kazu tanba ne’e tuir loloos nia labele kandidatu aan”.
Tanba durante tinan barak ita hetan apoiu finanseiru husi FIFA maibé la iha dezenvolvimentu ba Futebool no mós infrastrutura mós la’o nafatin hakdasak, klubu mós la dezenvolve ho di’ak nune’e mak la lori progresu ida di’ak ba ita nia futebolista sira.
“Futebool ne’e alein de investimentu ho industria, ita ko’alia mós kona-ba, reprezentasaun jogador sira mós sai nu’udar embaixador ba estadu Timor-Leste tanba lori ita nia Bandeira hananu hino nasionál iha rai sira enatu ita tenke perpara ita nia jogador sira ho kualidade di’ak” dehan nia.
Timor Leste presiza lideransa ida ne’ebé ke iha vizaun di’ak ba Futebool tanba durante Futebool iha de’it Dili la bá to’o iha Munisípiu sira Tanba ne’e mak jogador ida iha ba ona joga iha sub 16 ne’e ba nafatin tan sub-19 ate to’o ba joga hotu joga iha senior.
Nune’e mós amante Futebool José Carvalho informa, haree ba kandidatu prezidente FFTL Francisco Kalbuadi Lay ne’e nia figura ne’e la merese ona atu tuur iha Federsaun Futebool Timor-Leste (FFTL).
“Ita haree ba kandidatu ida seluk ne’ebé mak Eis prezidente FFTL Francisco Kalbuadi Lay ha’u haree nia figura ne’e ita bele dehan katak nia la merese ona atu mai tuur iha Federsaun Futebool Timor-Leste” dehan Amantes Futebool José Carvalho
Tanba durante nia mandatu tinan 10 ne’e ita haree la iha dezenvolvimentu ba Futebool no halo de’it falsifikasaun no lori jogador estranjeiru sira mai ne’e messagen ida hatudu katak nia interese ne’e Futebool ne’e instan, hakarak ohin lori jogador mai joga no nia lahatene katak prosesu atu hetan ekipa nasionál ne’e mós presiza prosesu ida.
Nia relata, “Kalbuadi Lay la merese para atu mai kandidatu aan maibé mós tenta atu haree fali saida mak akontese iha tinan haat liu ba wainhira kuandu eleisaun ba prezidente FFTL tinan haat liu ba saida mak nia halo ne’e dudu ema mai hanesan boneka ida atu bele nia alkansa de’it nia objetivu”.
Ita hatene agora dadaun nia sai prezidente komisaun organizadora iha AFC no mós nia iha ne’ebá hanesan Exco ne’e ita maka hakfodak dehan Exco ne’e la iha power ka la iha forsa para foti desizaun ida tanba ha’u mós rona isu dehan evoluasaun Futebool ne’e agora tenta atu hatama aan ba iha AFF.
Nia explika, “Francisco Kalbuadi Lay pozisaun ne’ebé mak aas liu no nia agora tuur iha AFC ne’e mak mai tuur fali iha Federsaun ne’e nia hatun nia aan dala ruma nia iha misaun ida hakarak tuur iha ne’ebá maibé ita hatene katak durante Futebool ne’e la’o ita haree atu kandidatu ba fatin ida ne’e presiza osan hodi sosa votus nia bele uza oportunidade ida ne’e para hetan buat ruma husi ne’e para promove nia aan iha li’ur”.
“Kalbuadi nia mai atu lori programa hodi hadia Federsaun ka nia mai atu apoder tanba 2019, 2020 no 2021 ne’e AFC ho FIFA no fó osan mai Timor ne’e kuaze 2.5 tuir informasaun ne’ebé mak amante rona katak iha tinan 2022 no 2023 osan ne’e bele sa’e to’o 4.5 ou 5 milloens dólar” tenik nia
Amantes haree katak nia la merese ona atu mai kandidatu aan tanba nia pozisaun iha ne’ebá aas liu prezidente nia tuir amante nia haree nia uza oportunidade ne’e atu buka lukru boot ruma iha ne’e
“Ha’u rasik Ministru públiku bolu ona ba fó deklarasaun testamuina no prosesu ne’e la’o maibé agora dadaun ne’e ita lahatene tinan tolu ne’e nia iha rai li’ur de’it tuir loloos nia iha rai laran para bele hatan nia kazu, no ne’e hatudu katak nia la iha boavontade atu hatan” tenik nia.
Ikus liu Amantes Futebool ne’e husu ba kandidatu ne’ebé mak ba tuur iha kadeira FFTL ba períodu 2022-2026 tenke ba ho vizaun no ba mós ho investimentu la’ós ba buka fali nia moris iha Federsaun.
Antes ne’e, Komité eleitorál hamutuk ho Komité Judisiáriu FFTL hala’o anunsiu ba kandidatura Komité Ezekutivu ba períudu 2022–2026, tuir estatutu FFTL artigu 37 kona-bá kritériu kandidatura no kódigu eleitorál Artigu 11, ne’ebé tuir planu sei hála’o kongressu eletivu iha loron 26 Fevereiru 2022. No kandidatu hamutuk nain tolu ne’ebe sei kompete ba kargu Prezidente FFTL. mak Francisco Kalbuadi Lay, Francisco Martins da C. P. Jerónimo no Nilton Telmo Gusmão dos Santos.
Enkuantu, kongresu FFTL ba dala-7 ne’e sei partisipa husi Asosiasaun Futebol husi Munisipiu hamutuk 12 inklui RAEOA, Asosiasaun Arbitrajen, Asosiasaun Futebol Femenino, Asosiasaun Treinadór, Asosiaun Sentru Juveníl, Asosiasaun Futsal, Kampeaun segundu divizaun (Emanuel Fc) ho Kampeaun primeira Divizaun (Karketu Díli Fc) epoka 2021. Parte hirak ne’e maki ha direitu hodi vota ba Presidente FFTL foun ba periodu 2022 – 2026.
Rep.: CharllY
