DILI— Federasaun atletizmu Timor-Leste (FATL) ho Federasaun karate-do Timor-Leste (FKTL) daudaun ne’e sira prepara atleta kualidade hodi kompete iha jogu internasionál sea games iha Vietnam, loron 10 to’o 23 Maiu 2022.
Tanba hakarak atleta partisipa iha Sea Games FATL sei halo kampionatu nasional hodi prepara atleta ka hili atleta atu nune’e bele partispa Sea Games iha Vietnam iha fulan maiu.
“reuniaun ho komité olímpiku ho konfederasaun nasionál federasaun sira ne’ebé mak halo preparasaun ba jogu Asian games ho sea games, tanba ne’e mak iha loron 20-23 maiu sei realiza kampionatu nasionál atu haree atleta sira nia kondisaun, atleta ne’ebé kualidade atu partisipa iha jogu sea games ne’ebé sei realiza iha Vietnam iha loron 10-23 Maiu 2023”, hateten, prezidente FATL, Afrânio Xavier do Amaral ba jornalista sira iha resintu SEJD, kuarta (12/01).
Prezidente FATL afirma, tanba ne’e mak federasaun atletizmu tenke realiza kampionatu nasionál atu haree prestasaun atleta sira nian, hodi kompete iha jogu sea games.
Afrânio hateten, “atleta ne’ebé mak tuir kompetisaun ne’e sei hili bainhira federasaun realiza kampionatu, kona-ba atleta ne’ebé husi munisípiu ne’e sira hatuda prestasaun di’ak federasaun nomea sira iha rezultadu kampionatu nasionál”.
Mezmu kampionatu nasionál ne’e sei dook ka tempu ne’ebé limitadu husi sekretáriu estadu juventude no desportu fó ne’e mós labele, tenke haree ba prestasaun minimal besik prestasaun sea games nian.
“Federasaun atletizmu prepara atleta barak, atleta nasionál kuaze sanulu-resin, maibé depende kuota ne’ebé mak SEJD, komité olímpiku no konfederasaun sira fó, Tanba ita tenke haree ba prestasaun ida ka rua”, nia afirma.
Afrânio dehan, kona-ba prestasaun ne’e Federasaun rasik foti atleta sira ne’ebé iha tinan 2019 no 2020, espera iha fulan tolu nia laran federasaun prepara sira hanesan uluk nian.
Tanba ne’e mak tenke ultrapasa covid-19, entaun iha pasadu ne’e sira la treinu, maibé governu fó fleksibilidade hahú 2020 to’o agora sira bele prepara di’ak.
Entretantu sekretáriu jerál FKTL, Antonio Carlos de Araújo, informa, “daudaun ne’e sira deside atleta na’in-5, feto ida mane haat mak sei partisipa iha jogu internasionál sea games iha Vietnam ne’ebé sei realiza iha Maiu nia laran”.
Antonio re-alsa, atleta sira ne’e sei treinu, tuir planu ne’ebé mak akontese, tanba kompetisaun ne’e sei hala’o iha Maiu, federasaun komesa ona treinu atleta sira .
“Hanesan ita hotu hatene jogu sea games ne’e loloos ne’e realiza iha tinan kotuk, maibé sira muda fali iha tinan 2022, tanba ne’e mak preparasaun to’o agora la’o hela”, nia hateten.
Nia afirma, “atleta ne’ebé sira hili ne’e husi kampionatu nasionál iha 2019 nia, tanba iha 2020 ne’e sira halo kampionatu nasionál ba atleta junior sira, sira hili atleta ne’ebé durante ne’e hatudu nia prestasaun iha rai-liur, ne’ebé hetan prestasaun di’ak”.
Araújo esplika, “prestasaun ne’e buat ida ne’ebé la’ós buat fasil ne’e presiza investimentu, investimentu katak prestasaun hanesan fasilidade, ekipamentu no nutrisaun”.
“Maibé hanesan federasaun iha responsabilidade tomak ba atleta ne’ebé mak hato’o ba CDTL, mezmu lakon mós lakon dignidade, karik hetan sorte ne’e hetan moralidade”, dehan Antonio.
Rep.: ADS
