Liquica – Prezensa Treinador foun, Master Kim lori esperansa boot ba atleta selesaun nasionál, Federasaun Taekwondo Timor Leste (FTTL), hodi garante Timor Leste hatudu rezultadu ne’ebé di’ak iha eventu Sea Games 2022.
Prezensa Master Kim iha Timor Leste ne’e tanba hetan apoiu husi Federasaun Taekwondo internasionál hodi fó treinu bá atleta selesaun nasionál Timor Leste nian. Treinador ho nasionalidade Coreano ne’e hahú fó treinu bá atleta ekipa nasionál Taekwondo sira desde fulan Novembru liu ba iha fatin sentru treinamentu Tibar Liquica.
Liu husi entrevista ho Treinadór selesaun nasionál FTTL Master Kim explika, dadaun ne’e sira prepara atu ba Sea Games tanba ne’e treinu makas iha tekniku no fiziku.
“Agora treinu fokus ba Sea Games, treinu makas ba tekniku buka distansia foti poin. ha’u hakarak foti medalla iha Sea Games. Hadia atleta sira nia tekniku fiziku tanba atleta sira la iha fiziku tanba ne’e ami treinu makas ba fiziku tekniku“. Dehan Master Kim ba jornalista iha Centru Treinamentu Tibar Liquica sexta (15/01).
Nune’e mós atleta selesaun nasionál, Indrolia Amuri afirma sira-nia treinu iha diferente boot tanba hetan tekniku foun ne’ebé antes ne’e seidauk hetan. Master mós iha esperiénsia ne’ebé mak barak tanba antes ne’e nia fó ona treinu ba ekipa nasionál iha nasaun sira selu-seluk entaun nia iha esperiénsia barak no tekniku ne’ebé nia fó diferente tebes.
“Hanesan atleta automatikamente ha’u mós iha tarjetu tanba durante ne’e ha’u halo prepasaun ne’ebé mak durante ne’e hetan ona medalla bronze no agora dadaun ha’u esforsu aan atu nune’e bele hetan fila fali medalla osan mean ou osan mutin liu husi esforsu ha’u fiar katak ha’u bele” dehan atleta
Iha fatin hanesan atleta Nilton Cortereal Lemos espresa sentimentu kontente hetan esperiénsia barak iha treinu maske todan no la hanesan iha tinan kotuk.
“Ami sente kontente tanba hetan master ne’ebé foun iha esperiénsia barak kona-ba treinu ne’e todan no la hanesan ho tinan kotuk ba wainhira ami halo perpasaun oras ida oras rua, maibé tinan ne’e ami nia perparasaun oras haat tanba ne’e ami sente todan” dehan atleta Nilton.
Atleta ne’e mós iha esperansa boot hodi hetan medalla no garantia sei hatudu rezultadu di’ak iha Sea Games Vietnam tinan ne’e.
“Ha’u mós iha tarjetu tanba uluk ita-nia Treinador nasionál de’it fó treinu ba kolega sira bele hetan medaila tanba sa agora prepasaun ne’ebé mak master husi Corea mak mai fó treinu tanba ne’e ha’u garantia ha’u sei hatudu rezultadu ne’ebé di’ak iha eventu Sea Games agora” tenik Nilton.
Nune’e mós atleta Ronavio da Cruz Martins hatete, pontu forte ne’ebé mak sira hetan husi treinu ne’ebé makas tebes no importante mós disiplina iha sira nia ekipa nasionál ne’e tanba treinu sempre on time.
“Matéria ne’ebé mak fó mai ami materia ne’ebé mak sente bele para dedika ami hodi ba kompete iha rai li’ur. No ha’u pernah lakon ona iha Sea Games 2019, maibé iha tinan ne’e ha’u lakohi para atu hamonu tan matan been hanesan 2019 no ha’u esforsu aan atu oferese medalla ba ha’u nia nasaun liu husi ha’u nia populasaun ida agora” dehan Ronavio ho Fiar aan.
Atleta Ana da Costa da Silva Pinto Belo haforsa mós espresa sentimentu kontente ho prezensa Master foun.
“Ami sente kontente ho prezensa Master foun ne’e iha ne’e treinu makas no disiplina mós makas, treinu jam 6 sai jam 9 no mós iha tekniku ne’e mak la hanesan ho tinan liu fó ho tinan ne’e difersa tebes. Ha’u sente kontente tebes tanba Treinador sira ne’ebé fó fiar mai ha’u liu husi selesaun liu ona, ha’u sei komete iha Sea Games iha Vietnam tarjetu bele hetan medaila emas” tenik Ana.
Tuir planu atleta FTTL hamutuk nian 7 mak sei ba partisipa iha Sea Games iha Vietnam tinan ne’e kompostu husi mane 4 no feto 3 ba feto sira sei joga iha under 49kg, 53kg 58 kg ba no mane sei joga iha under 54kg, 57kg, 63 kg no 68 kg.
Enteretantu eventu internasional ne’ebé mak organiza tinan rua dala ida ne’e sei hala’o iha loron 12 to’o 23 Maiu tinan ne’e iha Vietnam no sei partisipa husi nasaun sira iha Asean hamutuk 11 ho Modalidade hamutuk 40.
Rep : CharllY Junior
