Dili – Konfederasaun Desportu Timor Leste (CDTL sigla portugés) hala’o enkotru dahuluk ho Federasaun sira atu hadia sistema balu hodi dezenvolve Desportu iha futuru.
Hafoin aprezenta estrutura foun Konfederasaun Desportu Timor Leste (CDTL) ho programa sira ba Sekretaáriu Estadu Joventude no Desportu, iha tersa feira, horsei, maka ohin sira realiza enkontru dahuluk ho federasaun.
“Sorumutu Ohin ne’e sorumutu dahuluk entre CDTL ho Federasaun sira ho objetivu atu kria mekanizmu entre Konfederasaun ho Federasaun sira para bele hadia sistema balu mak ami establese ona ba futuru” dehan prezidente CDTL Macario Sanches ba jornalista iha hafoin remata enkotru ho Federasaun sira iha edifisiu CDTL kaikoli Dili kuarta (19/01).
Aleinde ida ne’e mós CDTL fahe informasaun ne’ebé mak sira perpara ona atu bele dezenvolve iha 2022 ho nune’e sira mós orienta ona ba Federasaun sira para bele hatan ba rekezitus balu ne’ebé mak diploma Ministerial rekere para Federasaun sira tenke kompleta.
Macario hatete, Tama ba ne’e ohin Federasaun sira mós fó sira nia ideias hanoin atu Konfederasaun mós funsiona didiak nune’e Federasaun sira bele fornese kualidade prestasaun ba atleta sira.
“Ami ko’alia ona semana oin ami sei bolu Federasaun 8 ne’ebé mak rezistradu ona para atu partisipa iha Sea Games iha fulan Maiu ida ne’e, ne’ebé semana oin ami sei tuur hamutuk oinsá atu bele hahú lansamentu ba preparasaun Treinamentu Sea Games”. Nia hatutan.
Iha fatin hanesan Sekretáriu Jerál Federasaun Criket Timor Leste, Mariana Dias Ximenes, Agradese ba estrutura foun Konfederasaun Desportu Timor Leste, (CDTL) ne’ebé mak fó ona biban ba Federasaun sira atu bele halibur hamutuk atu fó sira nia programa ne’ebé sira halo ona.
“Ba ami Federasaun Criket Agradese tebes tanba planu ne’e di’ak, espera planu ne’ebé sira halo bele realiza” tenik nia.
Nia deklara, Federasaun Criket mós iha ona planu ba 2022 nian no aban (20/01) sira sei submete maibé antes ne’e sira submete ona proposta ba SEJD no sira sei realiza Kompetisaun iha fulan fevereiru ne’e nia laran.
Totál Federasaun sira ne’ebé mak partisipa iha enkotru dahuluk ne’e hamutuk 24 mak Enkuantu Federasaun ne’ebé mak hamahan aan iha Konfederasaun Desportu Timor Leste (CDTL), ne’e hamutuk 36.
CharllY Junior
