DILI- Jogador nain-49 ne’ebe identifika husi Klubu 24 ne’ebe kompete iha Pra-Liga Futsal Timor Leste iha Tinan kotuk, sei treinu durante Fulan rua Molok deside jogador nain-16 hodi partisipa AFF Futsal Cup.
AFF Futsal Cup 2022 sei akontese iha Tailandia, iha Fulan Abril. Tanba ne’e treinador fiziku komesa halo preparasaun ba jogador sira husi klube ne’ebe sei tuir selesaun hodi sai jogador selesaun nasional reprezenta Timor-Leste.
“Selesaun ida foin mosu dahuluk iha nasaun tanba halo selesaun ba jogador husi pra-liga ne’ebe prosesu boot ida, tenki prepara diak tuir etapa” Treinador fiziku Adriano Quintão ba jornalista JHD iha fatin treinu, Fatuhada, Dili tersa (18/01).
Jogador hirak ne’ebe sei partisipa iha preparasaun hirak ne’e hamutuk najn-49 husi Klubu 24 mak partisipa iha Pra – Liga Futsal Timor Leste iha 2021. Iha Fulan marsu Mak sei halo Selesaun ikus hodi deside jogador Diak nain-16 atu reprezenta Timor Leste iha Tailandia.
“ita prepara ona jogador mai husi klube ne’ebe kompete ona iha pra liga futsal iha 2021. ami halo selesaun ba jogador husi klube 24 ho total jogador na’in-49 ne’ebe sei taes liu husi halo selesaun final iha fulan marsu nia laran hodi hetan jogador diak na’in -16 deit” Nia hatutan.
Enkuantu ba preparasaun, parte Treinador sei fahe ba faze rua, kada faze ho durasaun fulan Ida. Fulan primeiru ba Fiziku no segundu ba tekniku
“Preparsaun tempu ba treinu nian durante fulan rua, fulan ida ba fiziku no fulan ida ba tekniku” Nia hatutan.
Tuir Kalendariu, Selesaun nasional ne’ebe hahu prepara dauduan sei partisipa AFF Futsal Cup iha Fulan Abril Tinan ne’e iha Tailandia.
“Ita sei lori jogador sira ne’e partisipa kompetisaun ne’e iha fulan abril nia laran” Adriano Quintão hatutan.
Ho Ezistensia Pra-Liga Futsal Timor – Leste, maka bele fo opsaun barak ba ekipa Selesaun atu hetan jogador diak.
ADS
