Dili- Kandidatu Prezidente Federasaun Futebool Timor Leste ba periodu 2022-2026 konten polemika tan Kalbuadi nia kandidatura, nune’e iha kontradisaun perspetiva husi Adilson no Ipolitu.
Kontradisaun perspetiva ne’e hato’o husi Presidente Klubu Karketu Dili FC ho Presidente Asosiasaun Dili Oeste Ipolito Soares, hodi hatan ba polemika kona-ba kandidatura Prezidente FFTL ba jornalista iha Bairro Grilus segunda (17/01).
“Ba kandidatura Francisco Kabuadi Lay ami la iha memoria Futebool di’ak ho nia, tanba ami klubu sira hamrik depois Liga Futebool Amadora ne’e la’o, se ita ko’alia kona-bá Liga Futebool Amadora Francisco Kabuadi Lay la ezerse ona nia atividade funsaun hanesan prezidente Federasaun” dehan Adilson.
Enkuantu ba kandidatura rua seluk, karketu Díli FC iha memória di’ak, maske nune’e sira seidauk foti pozisaun atu apoiu ida ne’ebé?, entre nain rua.
“Entaun ami iha memoria di’ak ho kandidatura rua ne’e ba kongresu agora maibé ha’u hakarak hatete katak ami seidauk iha desizaun atu apoiu” tenik nia.
Kona-ba kandidatura atual FFTL Francisco Jerónimo, nia hatete katak klubu sira iha ñesementu oituan ba kandidatura ida ne’e mezmu ke atividade barak la’o no barak la la’o maibé iha obra balu ke prezidente atuál halo hela ezemplu mak ba kongresu ida ne’e ba klubu rua iha direitu atu ba votu ne’e obra ida ne’e mai husi Presidente ida Agora rekandidata.
Nia dehan kona-ba kandidatura Nilton Gusmao ne’e kandidatura ida ne’ebé iha potensia, kandidatura ida ne’ebé iha vizaun di’ak tanba ita haree dadaun to’o agora Liga Futebool Timor-Leste la’o, husi Liga Futebool Amadora Nilton Gusmao mak ezerse nia funsaun hanesan prezidente Liga, no Liga ne’e la’o nia konsege halo mudansa husi Liga Futebool Amadora to’o mai Liga Futebool Timor-Leste.
Tuir Nia, “hanesan klubu sira investe rasik ho sira-nia finansieiru tanba ne’e sira la depende ba kandidatura ida ne’ebé ba sira kandidatura entre rua ne’e sé mak sa’e sira sei servisu hamutuk maibé atu fo desizaun sira sei halo reuniaun jerál iha klubu no sei tetu mós sira nia programa sira nia vizaun no misaun ba Futebool Timor ne’e”.
Iha sorin seluk prezidente Asosiasaun Dili weste Ipolito Soares deklara, haree ba kandidatu na’in tolu ne’e iha esperiénsia hotu no sira sei hili kandidatu ida ne’ebé ke bele lori bola ne’e ba oin.
“Ba ha’u bainhira Federasaun ne’e hahu, ita haree gedung rua iha ne’e ita rasik mak uza, Liga mós utiliza dadauk obra ne’ebé ke Kalbuadi halo ne’e, mak ha’u hanoin sira hatutan mai, hanesan Francisco Jerónimo ne’e laos dehan halo, mais kuaze ita la haree“.
Tanba FIFA nia programa ne’e furak tebetebes bainhira ita aproveita ita nia Futebool rai laran bele bele la’o ba oin di’ak liu tan no mós haree ita nia infrastrutura ne’e FIFA apoiu maibé ita la book.
Enteretantu, kongresu FFTL ba dala-7 ne’e sei partisipa husi Asosiasaun Futebol husi Munisipiu hamutuk 12 inklui RAEOA, Asosiasaun Arbitrajen, Asosiasaun Futebol Femenino, Asosiasaun Treinadór, Asosiaun Sentru Juveníl, Asosiasaun Futsal, Kampeaun segundu divizaun (Emanuel Fc) ho Kampeaun primeira Divizaun (Karketu Díli Fc) epoka 2021. Parte hirak ne’e maki ha direitu hodi vota ba Presidente FFTL foun ba periodu 2022 – 2026.
CharllY Junior
